I. DEPUTACIÓN PROVINCIAL DE OURENSE

DEPUTACIÓN PROVINCIAL DE OURENSE

Convocatoria dunha edición do Curso de procedementos e técnicas de traballo con seguridade -PRL específicos- nas obras de abastecemento, saneamento e pocería (AF-43.2-2026)

Publícase que, por resolución da Presidencia do 19.10.2026 e núm. 2026/15293, se acordou o seguinte:

“A Deputación Provincial de Ourense deseña anualmente o seu Programa de formación continua de carácter agrupado, destinado a realizar de diversas accións formativas dirixidas ao persoal da Administración local da provincia.

No plan correspondente ao ano 2026 prevese, entre outras accións, a realización dunha edición do Curso de procedementos e técnicas de traballo con seguridade -PRL específicos- nas obras de abastecemento, saneamento e pocería (AF-43.2-2026). A competencia para a convocatoria da dita acción correspóndelle á Presidencia, de conformidade co artigo 34.1 da Lei de bases de réxime local, e o seu exercicio atopáse delegado na vicepresidenta primeira e deputada delegada de Recursos Humanos pola Resolución do 3 de agosto de 2023 (BOP do 11 de agosto de 2023).

Polo exposto, dispoño:

Primeiro. Aprobar as bases xerais da acción formativa que se relaciona a continuación, segundo a proposta formulada pola Sección de Formación da Deputación de Ourense que figura no expediente, e convocar o seguinte curso de formación continua:

Curso de procedementos e técnicas de traballo con seguridade -PRL específicos- nas obras de abastecemento, saneamento e pocería (AF-43.2-2026)

Bases xerais:

Primeira. Solicitudes de participación.

1. O persoal que desexe participar neste curso de formación presentará cuberta, en todas as epígrafes que lle corresponda, a instancia segundo o modelo oficial de solicitude de inscrición publicada no anexo II.

2.Todas as instancias deberán contar co correspondente informe, sobre a asistencia ao curso, do/a xefe/a do servizo ou departamento ao que pertenza o/a solicitante, para os efectos, entre outros, de confirmar a súa condición de traballador/a público/a local, e ir acompañadas da documentación complementaria que se establece na convocatoria.

3. A falsidade ou ocultación de datos esenciais para a selección dos aspirantes dará lugar á exclusión automática do curso solicitado e á imposibilidade de participar en ningunha outra actividade convocada pola Deputación de Ourense durante o prazo dun ano contado a partir da data da infracción.

4. As solicitudes de participación deberán remitirse á Sección de Formación da Deputación Provincial, mediante a súa presentación electrónica no Rexistro Xeral de documentos da Deputación de Ourense, dispoñible na sede electrónica da Deputación (sede.depourense.gal), ou en calquera dos lugares previstos no artigo 16.4 da Lei 39/2015, do 1 de outubro.

5. Non se admitirán as solicitudes de inscrición que non teñan cubertas todas as súas epígrafes de maneira correcta e lexible, ou ben que non conten coas sinaturas e selo requiridos.

6. A presentación dunha solicitude supón a aceptación expresa das bases xerais e das normas específicas de participación e asistencia que rexen e regulan as diferentes actividades formativas da Deputación de Ourense.

Segunda. Acceso ás actividades.

1. Poderá participar nesta actividade o persoal da Administración local en activo ao que vai dirixido o curso como destinatario/a da acción formativa que cumpra os requisitos específicos esixidos na convocatoria.

2. Daráselles preferencia para accederen ao curso aos/ás traballadores/as das entidades locais adheridas ao Programa de formación continua da Deputación de Ourense do ano 2026. Así mesmo, de xeito complementario poderá acceder ao curso, nas prazas vacantes, o persoal ao servizo da Administración estatal e autonómica.

Terceira. Selección das persoas participantes.

1. Os criterios que se aplicarán para a selección dos/das participantes son:

* A relación existente entre as funcións ou tarefas que realiza o/a solicitante no seu posto de traballo e a materia ou contidos obxecto do curso.

* A clase de persoal á que pertenza o/a solicitante, así como o seu grupo/categoría profesional, daráselle preferencia ao persoal fixo sobre o contratado.

* A data de ingreso do/da traballador/a na Administración pública, no acceso ao curso daráselle preferencia ao persoal de maior antigüidade.

2. Cando dende un mesmo departamento ou servizo se remitan varias solicitudes, e sexa preciso realizar unha selección dos/das participantes, unha vez rematado o prazo de presentación de solicitudes os responsables do persoal de cada departamento ou servizo deberán de informar por escrito, cando así se lles requira, sobre a priorización da admisión dos/das solicitantes.

3. A lista de persoas seleccionadas será aprobada por resolución da Presidencia e exposta oficialmente na sede electrónica da Deputación de Ourense, unha vez rematado o prazo de presentación de solicitudes; ao mesmo tempo, os/as peticionarios/as poderán obter información sobre a súa admisión chamando ao teléfono: 988 317 580.

4. Desde a Deputación Provincial poderá comunicárselles telefonicamente ás persoas seleccionadas que foron admitidas, co fin de obter a confirmación sobre a súa participación na acción formativa. A renuncia dos/das participantes admitidos/as que non poidan efectuar o curso por diferentes motivos deberá formalizarse sempre por escrito.

5. Os/as solicitantes admitidos/as que non comuniquen oficialmente que non van a asistir como mínimo cun día de antelación ao inicio do curso, sen causa excepcional que o xustifique, ou que abandonen a actividade formativa sen xustificación, quedarán excluídos/as de participar en calquera outra actividade de formación durante o prazo dun ano dende esa data.

Cuarta. Diplomas de aproveitamento.

1. Outorgaráselles o correspondente diploma de aproveitamento aos/ás alumnos/as que participen con regularidade e bo aproveitamento no desenvolvemento do curso e que superen satisfactoriamente os diferentes módulos e as probas de avaliación do curso.

2. É obrigatoria a asistencia e a puntualidade a todas as sesións presenciais do curso e a realización de todos os módulos e probas que integran o curso. Toda non asistencia á clase deberá ser debidamente xustificada polo/a interesado/a, sen exceder nunca o 15% das horas lectivas do curso. Unha non asistencia ás clases presenciais superior ao 15% da duración da acción formativa, aínda que sexa xustificada, impedirá a expedición do diploma de aproveitamento correspondente.

Quinta. Modificacións.

A Deputación de Ourense poderá variar, se fose preciso e a favor da eficacia da acción formativa, as características e mais os contidos do curso para adaptalos ás necesidades da Administración ou ás distintas continxencias que poidan xurdir, e buscará sempre as condicións óptimas para a realización da acción formativa.

Anexo I

Curso de procedementos e técnicas de traballo con seguridade -PRL específicos- nas obras de abastecemento, saneamento e pocería (AF-43.2-2026)

1. Persoas destinatarias.

* Traballadores/as que na actualidade presten os seus servizos profesionais no Consorcio de Augas de Valdeorras da Deputación de Ourense.

* Empregados/as públicos/as da Deputación de Ourense ou doutras entidades locais que formen parte das brigadas de obras e de infraestruturas, ou de zonas verdes ou medio ambiente.

* Persoal de oficios da Administración local da provincia que desempeñe tarefas de mantemento e conservación, ou de reparación dos edificios ou das instalacións municipais.

2. Desenvolvemento.

2.1. Modalidade da acción formativa: presencial.

2.2. Duración: 20 horas; 4 días lectivos.

2.3. Data de realización: 29 de outubro e 5-12-19 de novembro de 2026.

2.4. Horario das clases: de 8:30 a 14:00 horas; os xoves.

2.5. Lugar de realización do curso: Sede da Deputación Ourense na Comarca de Valdeorras, Casa Grande de Viloira (Rúa Novelista Elena Quiroga de Abarca, n.º 3. Viloira. O Barco). O Barco de Valdeorras.

2.6. Prazas: 15 participantes.

2.7. Número de edicións: unha.

3. Obxectivos.

* Preparar os/as participantes para adquirir os coñecementos específicos necesarios en materia de prevención de riscos laborais nos traballos nas redes de abastecemento, saneamento e pocería.

* Sensibilizar e fomentar entre os/as empregados/as da Administración local que realizan o curso unha cultura preventiva baseada na participación, consulta e corresponsabilidade dos traballos públicos.

* Acadar que cada alumno/a recoñeza as interferencias que se poden producir entre as actividades simultáneas, así como os protocolos de actuación ante situacións de emerxencia no lugar de traballo.

* Darlles a coñecer aos participantes na acción formativa o marco normativo e as obrigas da Administración en materia de coordinación de actividades e prevención de riscos laborais.

4. Programa.

4.1. Definición dos traballos.

4.1.1. Tipos de redes de abastecemento e saneamento.

4.1.2. Tipos de terreos. Características e comportamento.

4.1.3.Proceso de execución (perforación, apertura de gabias, esteamento, montaxe e unión de elementos, recheo da gabia, compactación, etc.).

4.1.4.Traballos de mantemento, reparación, rehabilitación e renovación de redes.

4.1.5. Equipos de traballo máis comúns.

4.2. Técnicas preventivas específicas.

4.2.1. Aplicación do plan de seguridade e saúde na tarefa concreta. Avaliación de riscos no caso de que non exista plan.

4.2.2. Riscos específicos e medidas preventivas.

4.2.3. Proteccións colectivas (colocación, usos, obrigacións e mantemento).

4.2.4. Proteccións individuais (colocación, usos, obrigacións e mantemento).

4.2.5. Esteamento e sistemas de sostemento.

4.3. Medios auxiliares, equipos e ferramentas.

4.3.1. Accesorios de elevación e de estrobo e útiles de carga.

4.3.2. Torres de acceso, escaleiras de man, escalas fixas de servizo e pasarelas.

4.3.3. Cintas transportadoras.

4.3.4. Equipos portátiles, ferramentas e pequeno material.

4.3.5. Outros equipos de traballo (compactador manual, equipos de soldadura, cabrestante ou elevador, etc.).

4.4. Verificación, identificación e vixilancia do lugar de traballo e a súa contorna.

4.4.1. Riscos e medidas preventivas necesarias.

4.4.2. Coñecemento da contorna do lugar de traballo (características e comportamento do terreo, espazos confinados, servizos afectados, construcións lindeiras, etc.).

4.5. Planificación das tarefas desde un punto de vista preventivo.

4.5.1. Almacenamento e provisión de materiais. Orde e limpeza.

4.5.2. Manipulación de produtos químicos. Ficha de datos de seguridade.

4.6. Interferencias entre actividades.

4.6.1. Actividades simultáneas ou sucesivas.

4.6.2. Protocolos de actuación.

4.7. Dereitos e obrigacións.

4.7.1. Marco normativo xeral e específico.

4.7.2. Organización da prevención.

4.7.3. Fomentar a toma de conciencia sobre a importancia de involucrarse na prevención de riscos laborais.

4.7.4. Participación, información, consulta e propostas.

4.7.5. Cumprimento operativo e legal. Conceptos xerais, responsabilidades e canles de consulta.

5. Prazo de presentación de solicitudes.

O prazo de presentación das solicitudes para participar nesta acción formativa rematará o luns 26 de outubro do 2026.

Segundo. Ordenar a publicación no BOP e na sede electrónica da presente convocatoria, bases e anexos.”

Publícase isto, e infórmase ás persoas interesadas de que contra o dito acto poderán interpoñer un recurso de reposición, previo ao contencioso – administrativo, ante o mesmo órgano que o ditou no prazo dun mes, ou, alternativamente e de forma directa, un recurso contencioso – administrativo ante o Xulgado do Contencioso - Administrativo de Ourense (ou outro que resultase territorialmente competente en aplicación das regras establecidas no artigo 14 de la Lei reguladora da xurisdición contencioso – administrativa), no prazo de dous meses. En ningún caso poderán simultanearse ambos os recursos.

Os prazos computaranse de data a data a partir do día seguinte ao de recibir esta notificación, e vencerán no día equivalente do mes natural seguinte ou, de non existir este, no último día do dito mes. No caso de que o día de vencemento sexa inhábil, entenderase prorrogado o dito prazo ao primeiro día hábil seguinte.

Durante o mes de agosto non contará o prazo para interpoñer o recurso contencioso-administrativo, salvo para o procedemento para a protección dos dereitos fundamentais no que o mes de agosto terá carácter de hábil.

En todo caso, poderá interpoñer calquera outro recurso ou acción administrativa ou xudicial que estime procedente.

Ourense, 20 de outubro de 2026. A deputada delegada de Facenda, Economía e Recursos Humanos (Pd.: Resol. 2023/9863, do 31/07/2023).

Asdo.: Marta Nóvoa Iglesias.

(Ver solicitude páx. seguinte)

R. 2.542