IV. ENTIDADES LOCAIS

CONCELLO DE CHANDREXA DE QUEIXA

Bases e convocatoria para a selección dunha praza de arquitecto/a por concurso-oposición para a súa cobertura como funcionario/a interino/a por programas.

Bases e convocatoria para a selección por concurso-oposición dun/ha funcionario/a interino/a por programas, a xornada parcial, de arquitecto/a.

Unha vez aprobadas por Decreto da Alcaldía nº 271/2026, do 30 de setembro de 2026, as bases e a convocatoria para a selección dunha praza de arquitecto/a por concurso-oposición para a súa cobertura como funcionario/a interino/a por programas, ábrese o prazo de presentación de solicitudes que será de 10 días naturais, que contarán desde a publicación deste anuncio no Boletín Oficial da Provincia de Ourense.

As citadas bases atópanse publicadas na sede electrónica deste Concello (https://www.chandrexadequeixa.es) e no taboleiro de anuncios. Os sucesivos anuncios desta convocatoria, cando procedan de conformidade coas bases, publicaranse na sede electrónica deste Concello (https://www.chandrexadequeixa.sedelectronica.gal) e no taboleiro de anuncios.

Achéganse as bases reguladoras a continuación.

Bases xerais da convocatoria para a selección e nomeamento como persoal funcionario interino por programa dun/ha arquitecto/a para o Concello de Chandrexa de Queixa

Primeira. Normas xerais

O obxecto das presentes bases é a selección como persoal funcionario interino para a execución do programa “Programa temporal para a regularización de expedientes técnicos e urbanísticos” do Concello de Chandrexa de Queixa, mediante o sistema de concurso-oposición.

Segunda. Condicións e funcións

O nomeamento como persoal funcionario interino para o programa “Programa temporal para a regularización de expedientes técnicos e urbanísticos” do Concello de Chandrexa de Queixa, será de conformidade co establecido no artigo 10.1 do Real decreto lexislativo 5/2015, do 30 de outubro, polo que se aproba o texto refundido da Lei do estatuto básico de empregado público. Este non poderá ter unha duración superior a tres anos, ampliable ata doce meses máis polas leis de función pública que se diten ao abeiro deste estatuto.

Grupo / Subgrupo: A1	Xornada: parcial (14 horas semanais)
Nº vacantes: 1	Duración: 18 meses ou ata o 30 de xuño de 2028

As retribucións para percibir serán as que figuran no convenio colectivo correspondente á dita categoría profesional.

As funcións do posto de traballo serán as seguintes:

• Colaborar coa Secretaría na tramitación dos expedientes relativos a planeamento, xestión e disciplina urbanística e medioambiental conforme coa súa capacitación técnica e profesional.

• Estudo e proposta de carácter técnico-administrativo de nivel superior; xestión das unidades encomendadas, emisión de informes/ditames, asesoramento especializado, proposta técnica de resolución de expedientes, execución de estudos e traballos, dirección de equipos humanos adscritos, etc.

•Atención ao público.

• Instalacións industriais e actividades suxeitas a A.I.A.

• Ordes de execución.

• Planeamento xeral.

• Planeamento de desenvolvemento.

• Xestión urbanística.

• Redacción de ordenanzas.

• Realizar informes de obra maior.

• Realizar informes preceptivos, dentro do seu eido competencial e profesional, e relativos ás materias propias do departamento.

• Asumir a supervisión directa, seguimento e informe de proxectos de infraestruturas públicas.

• Prestar colaboración e asistencia técnica por necesidades ou requirimento, naqueles asuntos propios de departamento e que entren dentro da súa capacitación profesional.

• Supervisión de proxectos de obras municipais.

• Dirección de obras municipais.

• Coordinación da seguridade e saúde.

• Calquera outra, propia da súa capacitación profesional, e vinculada co eido competencial no que se integra.

Terceira. Condicións de admisión das persoas aspirantes

Para poder participar nas probas de selección será necesario reunir os requisitos establecidos no artigo 56 do Real decreto lexislativo 5/2015, do 30 de outubro, polo que se aproba o texto refundido da Lei do estatuto básico do empregado público:

• Ter a nacionalidade española ou algunha outra que, conforme co disposto no artigo 52 da Lei 2/2015, do 29 de abril, do emprego público de Galicia, permita o acceso ao emprego público. Poden acceder ao emprego público como persoal funcionario en igualdade de condicións coas persoas de nacionalidade española:

- As persoas que posúan a nacionalidade doutros estados membros da Unión Europea.

- As persoas, calquera que sexa a súa nacionalidade, que sexan cónxuxes de persoas que posúan a nacionalidade española ou doutros estados membros da Unión Europea, sempre que non estean separadas de dereito.

- As persoas, calquera que sexa a súa nacionalidade, descendentes de persoas que posúan a nacionalidade española ou doutros estados membros da Unión Europea, sempre que sexan menores de vinte e un anos ou maiores da devandita idade dependentes.

- As persoas, calquera que sexa a súa nacionalidade, descendentes do cónxuxe non separado de dereito de persoas que posúan a nacionalidade española ou doutros estados membros da Unión Europea, sempre que sexan menores de vinte e un anos ou maiores da devandita idade dependentes.

- As persoas incluídas no ámbito de aplicación dos tratados internacionais subscritos pola Unión Europea e ratificados por España nos cales sexa aplicable a libre circulación de persoas traballadoras.

• Ter cumpridos dezaseis anos e non exceder a idade máxima de xubilación forzosa. Só por lei poderá establecerse outra idade máxima, distinta da idade de xubilación forzosa, para o acceso ao emprego público.

• Estar en posesión ou en condición de obter o título de licenciado/a ou Grao en Arquitectura ou equivalente na data de finalización do prazo de presentación de instancias. No caso de ser un título equivalente deberase achegar a documentación que acredite a equivalencia.

Así mesmo estar en posesión do título que acredite o grao de perfeccionamento no idioma galego ou Celga 4. Os/as aspirantes que non dispoñan de tal título deberán realizar unha proba de galego de acordo co establecido na base reguladora novena.

• Posuír a capacidade funcional para o desempeño das tarefas.

• Non ter sido separado/a mediante un expediente disciplinario do servizo de calquera das administracións públicas ou dos órganos constitucionais ou estatutarios das comunidades autónomas, nin atoparse en situación de inhabilitación absoluta ou especial para empregos ou cargos públicos por resolución xudicial, para o acceso ao corpo ou escala de funcionario/a ou para exercer funcións similares ás que desempeñaban no caso do persoal laboral, no que fose separado ou inhabilitado. No caso de ser nacional doutro estado, non acharse inhabilitado ou en situación equivalente nin ter sido sometido a sanción disciplinaria ou equivalente que impida o acceso ao emprego público no seu estado nos mesmos termos.

As persoas aspirantes con titulacións obtidas no estranxeiro deberán acreditar que están en posesión da correspondente validación ou da credencial que acredite, de ser o caso, a homologación do título. Este requisito non se lles aplicará ás persoas aspirantes que obtivesen o recoñecemento da súa cualificación profesional no ámbito das profesións reguladas ao amparo das disposicións de dereito da Unión Europea.

Cuarta. Forma e prazo de presentación de solicitudes

• As persoas que desexen participar nas probas selectivas convocadas deberán facelo constar mediante a instancia que se recolle no anexo III destas bases, dirixida ao alcalde do Concello.

• A instancia debe ir acompañada dos seguintes documentos:

a) Documento nacional de identidade.

b) Título esixido ou xustificante de ter aboado os dereitos para a súa expedición.

c) Xunto coa solicitude deberá presentarse folla de autobaremación, segundo modelo que figura como anexo II destas bases. A autobaremación realizarase conforme coa valoración de méritos contida no baremo que figura na cláusula sétima destas bases.

d) Acreditación dos méritos alegados.

e) O certificado acreditativo do coñecemento da lingua galega, de posuílo (Celga 4 ou equivalente).

Non obstante, no Rexistro Xeral do Concello de Chandrexa de Queixa facilitaráselles ás persoas interesadas un modelo de solicitude redactado segundo se recolle no anexo das presentes bases.

Nos supostos de discapacidade física ou psíquica, esta deberá acreditarse mediante a achega coa solicitude de participación no proceso de selección de certificado de discapacidade igual ou superior ao 33% expedido polo órgano competente da Administración autonómica, xunto co certificado de compatibilidade co posto de traballo asociado á praza. Así mesmo, poderán solicitar as necesidades específicas de adaptación e axuste de tempo e medios que considere oportunas para participar nas probas selectivas en condicións de igualdade. Para iso farán constar na solicitude o seu tipo de discapacidade e as posibles adaptacións que precisen para participar nas probas selectivas.

O prazo para a presentación de instancias, no Rexistro Xeral do Concello (rúa do Concello, nº 19, 32786 Chandrexa de Queixa), de xeito telemático na sede electrónica do Concello da Chandrexa de Queixa, https://chandrexadequeixa.sedelectronica.gal ou por calquera dos procedementos que prevé o artigo 16 da Lei 39/2015, do 1 de outubro de 2015, do procedemento administrativo común das administracións públicas, será de 10 días naturais contados a partir do día seguinte ao da publicación do texto íntegro das bases da convocatoria no Boletín Oficial da Provincia de Ourense.

Pódese obter un modelo de instancia (contido no anexo III desta convocatoria) de participación nas probas selectivas nas dependencias municipais.

No caso de que se remita a documentación por correo postal ou mediante presentación no rexistro doutra administración que careza de Sistema de Intercambio de Rexistros (SIR), aconséllaselles ás persoas aspirantes que comuniquen a presentación da instancia conforme co modelo do anexo III das presentes bases onde conste o selo coa data de presentación mediante un correo electrónico ao enderezo concello.chandrexadequeixa@eidolocal.es durante o mesmo prazo que o de presentación de instancias.

• As persoas aspirantes quedan vinculadas aos datos que fixeron constar na súa solicitude, aínda que os erros de feito que se puideren advertir poderán emendarse ou repararse en calquera momento, ben de oficio, ben a petición dunha parte.

Quinta. Admisión de aspirantes

• Unha vez rematado o prazo dos 10 días naturais fixado para a presentación de solicitudes, a Alcaldía ditará unha resolución relativa á aprobación da lista de persoas admitidas e excluídas, na que se especificarán, de ser o caso, os motivos de exclusión. A resolución publicarase no taboleiro de anuncios da sede electrónica. No caso de non existir persoas excluídas, a lista será considerada como definitiva.

• No caso de existir persoas aspirantes excluídas, dispoñerán dun prazo de 3 días hábiles, contados a partir do día seguinte ao da publicación do acordo, para poder emendar o defecto que deu motivo á exclusión.

Sexta. Tribunal cualificador

Os órganos de selección serán colexiados e a súa composición deberase axustar aos principios de imparcialidade e profesionalidade dos seus membros, e tenderase, así mesmo, á paridade entre mulleres e homes. O persoal de elección ou de designación política, o persoal funcionario interino e o persoal eventual non poderán formar parte dos órganos de selección. A pertenza aos órganos de selección será sempre a título individual, polo que non se poderá realizar en representación ou por conta de ninguén.

O tribunal cualificador estará constituído por un/ha presidente/a, un/ha secretario/a (que actuará con voz pero sen voto) e tres vogais, cos/coas seus/súas correspondentes suplentes. Ao abeiro do artigo 59.4 da Lei 2/2015, de emprego público de Galicia, as persoas membros dos órganos de selección, á excepción do secretario, deben pertencer a un corpo, escala ou categoría profesional na cal se requira unha titulación de nivel igual ou superior ao esixido para participar no proceso selectivo.

As persoas membros dos tribunais deberanse abster de intervir cando concorran nelas algunha das circunstancias previstas no artigo 23 da Lei 40/2015, do 1 de outubro, do réxime xurídico do sector público. Este feito deberanllo comunicar ao alcalde. Tampouco poderán intervir se realizaron tarefas de preparación de aspirantes para o mesmo corpo e especialidade durante os cinco anos anteriores á publicación desta convocatoria. Así mesmo, as persoas aspirantes poderán recusar as persoas membros do tribunal cando nelas concorra algunha das circunstancias previstas para a abstención e de conformidade co establecido no artigo 24 da Lei 40/2015. Unha vez constituído o tribunal tamén se poderán incorporar as outras persoas vogais titulares que non concorresen á sesión constitutiva e, de ser o caso, as suplentes.

As persoas membros do tribunal que asistan ás súas sesións percibirán axudas de custo pola súa asistencia, na contía legalmente establecida.

Sétima. Procedemento de selección dos aspirantes.

A selección constará de dúas fases: unha de concurso e outra de oposición.

A fase de concurso será previa á de oposición e será autovalorada previamente polo/a aspirante segundo o anexo II. Os puntos obtidos na fase de concurso sumaranse á puntuación obtida na fase de oposición para os efectos de establecer os/as aspirantes seleccionados/as. Estes puntos non poderán ser aplicados para superar a fase de oposición.

O tribunal cualificador publicará no taboleiro de anuncios da sede electrónica do Concello a relación de aspirantes coa valoración provisional de méritos da fase de concurso, indicando a puntuación obtida en cada apartado do baremo, así como o total. Os aspirantes dispoñerán dun prazo de dez días hábiles a partir do seguinte ao da publicación da devandita relación, para efectuar as alegacións pertinentes. Unha vez finalizado o devandito prazo, o tribunal, resoltas no seu caso as alegacións presentadas, publicará a relación coa valoración definitiva da fase de concurso.

Fase de concurso (previa á oposición)

A puntuación máxima da fase de concurso será de 4 puntos. Para a fase de concurso, serán méritos:

a) Experiencia profesional (máximo 3 puntos):

1. Por servizos prestados nunha administración local, na categoría e funcións obxecto desta convocatoria, puntuarase 0,10 puntos por mes completo traballado a xornada completa.

2. Por servizos prestados noutra administración na categoría e funcións obxecto desta convocatoria, puntuarase 0,05 puntos por mes a xornada completa.

No caso de días soltos computarase cando de forma acumulada acaden os 30 días. Durante o mesmo período non poderán computarse varias contratacións.

En contratos a tempo parcial efectuarase a equivalencia do tempo da xornada parcial á xornada completa.

A acreditación da experiencia laboral realizarase pola presentación da correspondente certificación, onde se reflicta claramente o posto desempeñado, a categoría e duración da relación laboral en meses, días ou horas, segundo o caso.

b) Cursos de formación realizados, impartidos por administracións públicas, universidades, INEM, formación continua no marco do acordo de formación continua para as administracións públicas ou formación ocupacional, relacionado coas funcións para desenvolver, con expedición de diploma ou certificado de asistencia, máximo 1 punto:

1. Entre 30 e 60 horas: 0,10 puntos.

2. Entre 61 e 100 horas: 0,25 puntos.

3. Entre 101 e 200 horas: 0,40 puntos.

4. De 201 horas en adiante: 0,50 puntos.

Non se valorarán os cursos de formación de menos de 30 horas.

O tribunal cualificador comprobará e verificará as autobaremacións realizadas polos aspirantes, validando e aprobando como propias do tribunal aquelas coas que estivera conforme por ser axeitadas ás valoracións contidas no baremo que figura como anexo II destas bases.

O tribunal poderá minorar a puntuación consignada polos aspirantes no caso de méritos non valorables segundo ao baremo de méritos ou por erros aritméticos. O tribunal non poderá outorgar unha puntuación maior á consignada polos aspirantes, salvo erro aritmético destes.

No momento da valoración da fase de concurso só serán obxecto desta os méritos alegados e achegados coa solicitude, de conformidade co establecido na base anteriormente citada, no prazo de presentación de solicitudes.

Fase de oposición

• Unha resolución da Alcaldía determinará a data e a hora de realización do primeiro exercicio. Esta resolución publicarase no taboleiro de anuncios da sede electrónica municipal.

• As persoas aspirantes serán convocadas para cada exercicio nun chamamento único. As persoas opositoras que non se presenten aos exercicios perderán os seus dereitos, agás nos casos debidamente xustificados, que o tribunal terá que resolver de xeito motivado.

• As persoas aspirantes deberanse presentar para realizar cada exercicio provistos do DNI ou dun documento fidedigno acreditativo da súa personalidade a xuízo do tribunal, así como dos medios materiais adecuados e necesarios para a realización das probas.

Oitava. Desenvolvemento dos exercicios das probas selectivas

1. O tribunal poderalles requirir ás persoas opositoras que acrediten a súa identidade en calquera momento.

2. A orde de actuación das persoas opositoras para a realización daqueles exercicios que non poidan facerse de xeito simultáneo, comezará pola letra inicial que resulte do último sorteo anual efectuado pola Xunta de Galicia para os seus procesos selectivos. No suposto de non existir ningunha persoa aspirante cuxo primeiro apelido comece pola letra indicada, a orde de actuación iniciarase por aquelas cuxo primeiro apelido comece pola letra seguinte, e así sucesivamente.

3. Se en calquera momento do proceso selectivo chega ao coñecemento do tribunal que algunha das persoas aspirantes non posúe a totalidade dos requisitos esixidos na respectiva convocatoria, despois dunha audiencia coa persoa interesada deberáselle propoñer ao alcalde a súa exclusión, indicando as inexactitudes ou falsidades observadas para os efectos procedentes.

4. Unha vez concluídos cada un dos exercicios da oposición correspondente, o tribunal fará pública, no taboleiro de anuncios electrónico municipal, a relación de aspirantes que os superaron, con indicación da puntuación obtida e poderán formular nun prazo de 2 días alegacións ou reclamacións que deberán ser resoltas polo tribunal antes do comezo do seguinte exercicio.

5. A listaxe de persoas aprobadas de cada exercicio deberase publicar no taboleiro de anuncios electrónico e na web municipal, cando menos, con 12 horas de antelación con respecto á nova reunión do tribunal.

6. Desde a finalización dun exercicio ou proba ata o comezo da seguinte deberá transcorrer un período mínimo de 72 horas e máximo de 45 días naturais.

7. Contra os acordos do tribunal poderase interpoñer un recurso administrativo ante o órgano competente, conforme co previsto na Lei 39/2015, do 1 de outubro, do procedemento administrativo común das administracións públicas.

O tribunal deste proceso selectivo queda facultado para a interpretación das bases da convocatoria, así como para resolver cantas dúbidas e incidencias xurdan na súa aplicación, a cuxo efecto poderá adoptar os acordos necesarios procurando a boa orde e desenvolvemento do proceso selectivo.

Novena. Exercicios da oposición

Primeiro exercicio, de carácter obrigatorio e eliminatorio.

Consistirá en contestar, por escrito, un cuestionario tipo test de 60 preguntas, con catro respostas alternativas das que só unha será a correcta, sobre o contido do programa da convocatoria contido no anexo I das presentes bases. O tempo máximo para realizar este exercicio será de 90 minutos.

Penalizaranse as preguntas mal contestadas, de forma que por cada 3 preguntas incorrectas se descontará unha correcta ou a súa parte proporcional.

Para a elaboración das preguntas repartirase de forma equitativa os temas entre os membros do órgano de selección.

Segundo exercicio, de carácter obrigatorio e eliminatorio.

Terá por obxecto valorar a aplicación práctica dos coñecementos teóricos das persoas aspirantes mediante a resolución dun suposto práctico proposto polo tribunal antes da realización do exercicio, referido ao contido do temario anexo e relacionado coas funcións propias do posto de traballo. O tempo máximo de realización deste exercicio será de 1 hora.

Neste exercicio valorarase a formación xeral, a claridade e orde de ideas, facilidade de exposición escrita e a capacidade de síntese.

Proba de galego

As persoas aspirantes que non demostren o coñecemento da lingua galega a través do correspondente certificado (Celga 4 ou equivalente) terán que realizar obrigatoriamente unha proba específica que demostre tal coñecemento.

Consistirá nunha tradución completa, do castelán ao galego, dun texto nun tempo máximo de 30 minutos. No caso de non realizar a tradución completa, serán consideradas non aptas.

Décima. Cualificación dos exercicios da oposición

Cada un dos exercicios obrigatorios e eliminatorios da oposición serán cualificados de 0 a 5 puntos (agás a proba de galego, que se puntuará coa cualificación de apto/a ou non apto/a). Para aprobar cada un dos exercicios e acceder ao seguinte é necesario obter unha puntuación mínima de 2,5 puntos.

A cualificación final estará determinada pola suma das cualificacións parciais obtidas polas persoas aspirantes que fosen superando todos e cada un dos sucesivos exercicios obrigatorios e eliminatorios. A orde de colocación das persoas aspirantes na lista definitiva de aprobadas establecerase de maior a menor puntuación.

Undécima. Cualificación final e listaxe de persoas aprobadas

A cualificación obtida polas persoas aspirantes será o resultado da suma das puntuacións outorgadas nos distintos exercicios obrigatorios e eliminatorios máis os da fase de concurso.

Unha vez determinada a cualificación final das persoas aspirantes, o tribunal fará pública a listaxe de persoas aprobadas, por orde de puntuación, no taboleiro de anuncios da sede electrónica e na web municipal.

No caso de empate nas puntuacións totais de dúas ou máis persoas aspirantes, a situación resolverase tendo en conta a maior puntuación obtida no primeiro exercicio, de persistir o empate, resolverase tendo en conta a maior puntuación obtida no segundo exercicio. Se isto non fora suficiente, resolverase mediante un sorteo que se realizará en presenza das persoas interesadas.

Duodécima. Achega de documentos por parte das persoas opositoras aprobadas

A persoa aspirante proposta deberá achegar, dentro do prazo máximo de 3 días naturais contados desde a publicación da listaxe de persoas aprobadas, os documentos acreditativos de capacidade e requisitos esixidos na convocatoria:

• Certificado/Informe médico de non padecer enfermidade que inhabilite para o exercicio da función.

• Declaración xurada sobre o cumprimento dos requisitos para ser contratado.

• Copia da tarxeta da afiliación á Seguridade Social.

• Certificado de número de conta bancaria.

A non presentación dentro do prazo fixado da documentación esixida nesta base e agás nos casos de forza maior, ou cando do seu exame se deduza que carecen dalgún dos requisitos sinalados na base 3ª, suporá que o aspirante non poderá ser contratado e quedarán anuladas as actuacións, sen prexuízo da responsabilidade en que incorrese por falsidade na solicitude de participación.

Décimo terceira. Formalización do nomeamento

Unha vez concluído o proceso selectivo, a persoa aspirante proposta será nomeada como persoal funcionario interino por programa, unha vez que xustifique documentalmente o cumprimento dos requisitos esixidos para o ingreso.

Décimo cuarta. Lista reserva

As persoas aspirantes que superasen o proceso selectivo e non obtivesen a praza pasarán a conformar unha lista reserva para a cobertura temporal de prazas por nomeamento de persoal funcionario interino reguladas de acordo coa normativa específica correspondente, que terá unha vixencia de 3 anos ou ata que todos os interesados que figuren nela non manifesten interese nunha oferta de traballo concreto ou presenten a súa renuncia, ou esgotamento desta. Para iso, de acordo coa proposta do tribunal, farase pública no taboleiro de anuncios da sede electrónica a resolución aprobando a lista reserva coa relación do resto de opositores que superasen o proceso selectivo, en orde descendente con respecto ás cualificacións obtidas en todas as probas.

Décimo quinta. Funcionamento da lista reserva

Os que formen parte dela poderán ser chamados (sempre respectando a orde da lista) para cubrir postos de traballo de arquitecto/a de conformidade co establecido no artigo 10 do Real decreto lexislativo 5/2015, do 30 de outubro, polo que se aproba o texto refundido da Lei do estatuto básico de empregado público.

Cando sexa necesario proceder ao chamamento para a cobertura dunha praza, trala tramitación do seguinte procedemento, ofertarase á primeira persoa da lista que estea pendente de chamar por orde de mellor puntuación.

O Departamento de Persoal porase en contacto telefónico coa persoa aspirante, seguindo rigorosamente a orde establecida na lista.

Se o aspirante rexeita a oferta de emprego pasará ao final da lista, salvo que o interesado manifeste expresamente a súa vontade de ser excluído dela.

O aspirante que integrado na lista sexa chamado para cubrir unha necesidade e alegue e xustifique a imposibilidade de incorporación efectiva por estar traballando ou de baixa laboral, continuará na lista de espera na mesma posición que ocupaba inicialmente, aínda que non será activado na lista e chamado para unha nova oferta ata que o propio aspirante comunique ao Departamento de Persoal que está dispoñible por haberse modificado a causa que alegou para non aceptar a oferta de traballo. Destas incidencias deixarase constancia no expediente administrativo.

Se existise no momento do chamamento máis dunha vacante dispoñible que deba ser cuberta estas deberanse ofertar aos aspirantes en función da orde de prelación que ostenten.

No caso de manifestar o seleccionado o seu interese, deberá presentar a documentación esixida na cláusula décimo segunda destas bases.

O aspirante que sexa obxecto da contratación, unha vez finalizada a súa prestación será colocado de novo na lista de reserva na mesma posición que tiña adxudicada orixinariamente, de xeito que poderá ser chamado novamente para outra contratación.

Os integrantes da bolsa poderán en calquera momento comunicar a renuncia definitiva á integración nesta, mediante solicitude por escrito que terá que ir dirixida ao alcalde da Corporación.

Décimo sexta. Carácter vinculante das bases

As bases xerais e específicas desta convocatoria vinculan á Administración municipal, os tribunais cualificadores e as persoas aspirantes que participen nos procesos selectivos convocados. Para calquera dúbida que xurda na interpretación destas bases e no desenvolvemento das probas correspondentes, estarase ao que decida o tribunal por maioría de votos.

Décimo sétima. Publicidade.

As bases do presente proceso selectivo publicaranse integramente no taboleiro de anuncios da sede electrónica do Concello de Chandrexa de Queixa: https://chandrexadequeixa.sedelectronica.gal e no Boletín Oficial da Provincia de Ourense.

Os resultados das probas, as convocatorias de exames, citacións e emprazamentos aos aspirantes, así como calquera actuación do tribunal cualificador levaranse a cabo a través do taboleiro de anuncios da sede electrónica do concello https://chandrexadequeixa.sedelectronica.gal, medio exclusivo de notificación aos interesados de conformidade co previsto no artigo 45.1. b) da Lei 39/2015, de procedemento administrativo común das administracións públicas, salvo que estas bases dispoñan expresamente o contrario; non obstante, o Concello, se o estima oportuno, poderá utilizar ademais outros medios de publicación ou comunicación.

Décimo oitava. Incidencias e recursos

As presentes bases e a convocatoria poderanse impugnar consonte co establecido na Lei 39/2015, do 1 de outubro, do procedemento administrativo común das administracións públicas.

Así mesmo, a xurisdición competente para resolver as controversias en relación cos efectos e coa resolución do contrato laboral será a xurisdición social.

Contra a resolución da Alcaldía que aprobe as presentes bases, que pon fin á vía administrativa, poderase interpoñer un recurso contencioso-administrativo ante os xulgados do contencioso administrativo, no prazo de dous (2) meses contados dende o día seguinte ao da publicación do anuncio da convocatoria do proceso selectivo no Boletín Oficial da Provincia de Ourense, segundo o artigo 46.1 da Lei 29/1998, do 13 de xullo, da xurisdición contencioso-administrativa. Así mesmo, poderase interpoñer un recurso potestativo de reposición ante o alcalde no prazo dun (1) mes contado a partir do día seguinte ao da publicación do anuncio do proceso selectivo no Boletín Oficial da Provincia de Ourense (artigos 123 e 124 da Lei 39/2015, do 1 de outubro, de procedemento administrativo común das administracións públicas). No caso de que se interpoña o recurso potestativo de reposición, ata que sexa resolto expresamente ou se produza a desestimación presunta, non se poderá interpoñer o recurso contencioso-administrativo (artigos 123.2 da Lei 39/2015, do 1 de outubro, de procedemento administrativo común das administracións públicas). Unha vez transcorrido o prazo dun (1) mes desde a interposición do recurso de reposición sen que se teña recibido notificación da resolución deste, este se poderá entender desestimado conforme co previsto no artigo 24.1 da Lei 39/2015, do 1 de outubro, do procedemento administrativo común das administracións públicas.

No non previsto nas bases, aplicarase a Lei 2/2015, do 29 de abril, do emprego público de Galicia, a Lei 7/1985, do 2 de abril, reguladora das bases do réxime local, o Real decreto lexislativo 781/1986, do 18 de abril, polo que se aproba o Texto refundido das disposicións legais vixentes en materia de réxime local, o Real decreto lexislativo 5/2015, do 30 de outubro, polo que se aproba o texto refundido da Lei do estatuto básico do empregado público, o Real decreto lexislativo 2/2015, do 23 de outubro, polo que se aproba o texto refundido da Lei do estatuto dos traballadores, modificado polo Real decreto Lei 32/2021, do 28 de decembro, de medidas urxentes para a reforma laboral, a garantía da estabilidade no emprego e a transformación do mercado de traballo, o Real decreto lexislativo 5/2015, do 30 de outubro, polo que se aproba o texto refundido da Lei do estatuto básico de empregado público e o Convenio colectivo do persoal do concello (de ser o caso).

Décimo novena. Protección de datos de carácter persoal.

De acordo co establecido pola normativa vixente en materia de protección de datos, informámoslle a aqueles aspirantes que presenten a súa solicitude para participar no presente procedemento de selección de que o responsable do tratamento dos seus datos persoais é Concello de Chandrexa de Queixa.

Os datos serán utilizados para prestarlle o servizo solicitado e a xestión administrativa derivada da prestación do servizo. Os datos non se cederán a terceiros, salvo por obriga legal. Os aspirantes terán dereito a acceder, rectificar ou suprimir os datos erróneos, solicitar a limitación do tratamento dos seus datos así como opoñerse ou retirar o consentimento en calquera momento e solicitar a portabilidade destes en calquera momento.

Anexo I

Temario

1. A Constitución española de 1978. Características, estrutura e contido. A reforma constitucional.

2. Os dereitos fundamentais: evolución histórica e conceptual. Os dereitos fundamentais e as liberdades públicas.

3. Os dereitos económicos e sociais na Constitución española. Principios da economía social.

4. Democracia directa e democracia representativa na Constitución española. A participación política. Os partidos políticos.

5. O sufraxio. Formas e técnicas de articulación. A Lei orgánica de réxime electoral xeral.

6. A Monarquía parlamentaria. A Coroa: significado e retribucións. O referendo.

7. As Cortes Xerais. Composición e funcións.

8. O Goberno. Funcións e potestades. Composición, designación e remoción do Goberno e o seu presidente.

9. A función parlamentaria de control de Goberno. Órganos dependentes das Cortes Xerais.

O Defensor do Pobo.

10. O Tribunal Constitucional. Organización, composición e atribucións.

11. A organización territorial do Estado: regulación constitucional. Distribución de competencias entre o Estado e as comunidades autónomas.

12. Os estatutos de autonomía. Significado e contido.

13. O Estatuto de Autonomía da Comunidade Autónoma de Galicia. Estrutura. Competencias.

14. O Parlamento de Galicia: composición, funcións e potestades.

15. O Goberno de Galicia. O presidente da Comunidade e o Consello da Xunta. Composición, designación e remoción. As consellerías: estrutura básica.

16. Réxime local español. Regulación constitucional e normativa xurídica. Liñas xerais de organización do municipio e provincia.

17. O municipio. Historia das clases de entes municipais no dereito español.

18. O termo municipal. A poboación. O padrón de habitantes.

19. Organización e competencias municipais. Réxime de funcionamento dos órganos colexiados locais.

20. Ordenanzas e regulamentos das entidades locais. Clases. Procedemento de elaboración e aprobación.

21. Autonomía municipal e tutela.

22. Os bens das entidades locais. Réxime de utilización dos bens de dominio público.

23. O servizo público na esfera local. Os modos de xestión dos servizos públicos.

24. A Lei de incompatibilidades do persoal ao servizo das administracións públicas.

25. Dereitos e deberes dos empregados públicos. Réxime disciplinario do persoal ao servizo das administracións públicas.

26. A Lei 39/2018, do 1 de outubro, do procedemento administrativo común. Os interesados no procedemento administrativo. Os actos administrativos. Fases do procedemento.

27. Lei orgánica 3/2007, do 22 de marzo, para a igualdade efectiva de mulleres e homes e Lei 7/2023, do 30 de novembro, para a igualdade efectiva de mulleres e homes de Galicia.

Parte específica

28. Evolución histórica do Dereito urbanístico español.

29. Real decreto lexislativo 7/2015, do 30 de outubro, polo que se aproba o texto refundido da Lei do solo e rehabilitación urbana.

30. Normativa urbanística aplicable na Comunidade de Galicia. A Lei 2/2016, do 10 de febreiro, do solo de Galicia.

31. Planeamento urbanístico municipal. Determinacións legais e regulamentarias. Ordenanzas municipais. Determinación sobre redes públicas.

32. Réxime urbanístico do solo. Clasificación do solo. Dereitos e deberes.

33. O plan básico autonómico e os plans básicos municipais.

34. Planeamento e desenvolvemento dos plans xerais. Os plans parciais: disposicións xerais.

Obxecto. Determinacións e documentación. Plans especiais: finalidades e clases.

35. Delimitacións do solo de núcleo rural. Estudos de detalle. Catálogo de bens e espazos protexidos.

36. Os plans xerais de ordenación municipal. Formulación e contido. Determinacións.

Documentación. Procedemento para a súa aprobación.

37. Vixencia, modificación e revisión dos plans.

38. Execución dos plans. Requisitos previos á actuación. Ámbito de actuación.

39. Delimitación de polígonos de execución. Sistemas de actuación. Principios xerais da execución dos plans. Substitución do sistema.

40. Distribución equitativa de beneficios e cargas. Áreas de repartición. Aproveitamento tipo.

41. O sistema de compensación. Execución directa polos propietarios. Disposicións xerais. Xuntas de compensación. Estatutos e bases. Proxecto de compensación. Execución de obras e cesións.

42. O sistema de cooperación. Proxecto de reparcelación. Criterios e procedementos.

43. Sistema de expropiación. Disposicións xerais. Procedemento do sistema de expropiación.

Pago do prezo xusto. Toma de posesión.

44. O sistema de execución forzosa. Características do sistema. Contido e efectos.

45. Réxime de valoración do solo. Criterios xerais de valoracións do solo e demais dereitos.

46. Intervención da Comunidade de Galicia en actos de uso do solo, edificación e construción. Cualificacións urbanísticas.

47. Intervención municipal en actos de uso de solo, construción e edificación, licenzas urbanísticas. Competencia e procedemento.

48. Inspección urbanística. Ordes de execución, en especial as relativas á conservación e rehabilitación.

49. Protección da legalidade urbanística. Supostos legais e medidas de protección.

50. A declaración legal de ruína. Ruína legal e ruína física. Intervención do arquitecto nos expedientes de ruína. Informes e ditames.

51. Instrumentos de incidencia no mercado inmobiliario. Patrimonio público do solo.

Dereito de tenteo e de retracto.

52. Infraccións urbanísticas. Tipos. Sancións. Prescricións.

53. Normativa urbanística do Concello de Chandrexa de Queixa.

54. Infraestruturas xerais viarias, redes arteriais e urbanas. Lei de estradas da Comunidade de Galicia.

55. Lexislación sobre augas e regulamentos de desenvolvemento.

56. Código técnico da edificación. Cumprimento e xustificación nos proxectos de edificación.

57. Construcións escolares. Instalacións deportivas. Cesión gratuítas de terreos para estes fins. Condicións que reunirán estes para a cesión.

58. Vivendas sociais. Vivendas de protección oficial . Normativa. Xestión.

59. Zonas libres. Parques e xardíns. Condicións urbanísticas de ordenación. Xestión para obtención de dotacións libres. Criterios de deseños de zonas libres.

60. Criterios de deseño arquitectónico e urbano en conxuntos históricos. Principios teóricos de restauración e rehabilitación.

61. Clasificación e estudo dos terreos. Natureza e composición. Sondaxes e análises.

62. Escavacións e explanacións. Modo de realizalas. Aperturas de pozos e gabias para cimentacións. Esteos, apeos, recheos, terrapléns e noiros.

63. Lei 9/2013, do 19 de decembro, do emprendemento e da competitividade de Galicia.

64. Normativa vixente en materia de accesibilidade.

65. Lexislación sobre protección dos camiños de Santiago.

66. Disposicións mínimas de seguridade e saúde nas obras de construción (RD 1627/1997). Disposicións xerais. Disposicións específicas de seguridade e saúde durante as fases do proxecto e execución das obras. Avaliación e prevención de riscos en obras e actividades que non requiran proxecto.

67. Normas urbanísticas e culturais na regulación do patrimonio arquitectónico.

68. Concepto de patrimonio histórico, o seu marco constitucional e sistema de pertenza a este.

69. Lexislación sobre patrimonio cultural de Galicia.

70. Forxados. Tipos. Características e aplicacións.

71. Cubertas inclinadas. Criterios de deseño. Materiais de cubrición.

72. Cerramentos e carpinterías exteriores. Cerramentos: tipoloxía e característica, revestimentos exteriores. Carpinterías: tipoloxía e características.

73. Defensa dos edificios contra os elementos exteriores. Auga, neve, vento, frío, calor e ruído.

74. Instalacións de fontanería. Auga fría e quente. Sistemas e criterios de elección. Execución.

Conducións.

75. Instalacións de saneamento: materiais e sistemas. Redes horizontais e verticais.

76. Instalacións de calefacción e acondicionamento do aire. Sistemas. Instalacións. Fonte de calor e produción do frío. Conducións.

77. Instalacións de electricidade. Iluminación: niveis e tipos. Iluminación de emerxencia.

78. Defensa contra incendios. Materiais ignífugos e a súa protección. Efectos do lume contra as estruturas. Normativa.

79. Recoñecementos de edificios. Clasificación do estado de ruína. Sinales de ruína e medidas de prevención.

80. Recoñecementos de edificios. Clasificación do estado de ruína. Sinais de ruína e medidas de previsión.

81. Acabados interiores. Particións. Pavimentos. Revestimentos en paredes. Falsos teitos.

82. Técnicas de restauración e consolidación de edificios históricos-artísticos.

83. Replanteos en xeral. Definición. Replanteo dun edificio. Útiles empregados. Execución dos traballos.

84. Saneamento e redes de alcantarillado. Materiais e execución. Medición.

85. Fábricas de ladrillo. Execución. Disposición construtivas, aparellos, medición.

86. Solos. A súa función. Partes de que consta. Elementos resistentes e materiais que se empregan. Pavimentos: clases. Medición.

87. Encofrados. Xeneralidades. Condicións que deben reunir. Materiais e execución. Medición.

88. Pavimentos especiais en conxuntos históricos- artísticos.

89. Mobiliario en conxunto histórico-artístico.

90. Criterios de deseño e adecuación nos contornos de edificios históricos-artísticos.

91. Os bens de interese cultural na lexislación sobre o patrimonio. Ordenación xeral e especial.

92. A Lei 38/1999, de ordenación da edificación. Ámbito de aplicación e requisitos da edificación.

93. O proceso edificatorio na LOE.

94. Criterios de valoración: principios e definicións. Métodos de valoración.

95. Lei 1/2021, do 8 de xaneiro, de ordenación do territorio de Galicia.

96. Lei 1/2016, do 22 de abril, de rehabilitación e de rexeneración e renovación urbanas de Galicia.

97. Lei 21/2013, do 9 de decembro, de avaliación ambiental.

98. Lei 10/2017, de 27 de decembro de espectáculos públicos e actividades recreativas de Galicia.

99. Decreto 128/2016, do 25 de agosto, polo que se regula a certificación enerxética de edificios na Comunidade Autónoma de Galicia.

100. Normas de habitabilidade de vivendas en Galicia: Decreto 29/2010, do 4 de marzo.

Anexo II

Modelo de autobaremación méritos-fase de concurso

1. Datos do/a solicitante
NIF/DNI	Apelidos:	Nome:
Enderezo:
Municipio e provincia
Código Postal:	Teléfono:	Email:

2. Méritos a valorar

A) Cursos de formación relacionados co posto de traballo:

Denominación do curso	Administración/ Entidade que imparte	Horas	Puntos

B) Experiencia profesional

Posto: Administración:

Tipo de xornada: (Completa / Parcial -horas): En contratos a tempo parcial debe calcular a equivalencia do tempo da xornada parcial á xornada completa

Meses/xornada completa	Meses/xornada parcial	Días soltos	Total puntos

Posto: Administración:

Tipo de xornada: (Completa / Parcial-horas):

En contratos a tempo parcial debe calcular a equivalencia do tempo da xornada parcial á xornada completa

Meses/xornada completa	Meses/xornada parcial	Días soltos	Total puntos

Posto: Administración:

Tipo de xornada: (Completa / Parcial -horas):

En contratos a tempo parcial debe calcular a equivalencia do tempo da xornada parcial á xornada completa

Meses/xornada completa	Meses/xornada parcial	Días soltos	Total puntos

Posto: Administración:

Tipo de xornada: (Completa / Parcial -horas):

En contratos a tempo parcial debe calcular a equivalencia do tempo da xornada parcial á xornada completa

Meses/xornada completa	Meses/xornada parcial	Días soltos	Total puntos

Posto: Administración:

Tipo de xornada: (Completa / Parcial -horas):

En contratos a tempo parcial debe calcular a equivalencia do tempo da xornada parcial á xornada completa

Meses/xornada completa	Meses/xornada parcial	Días soltos	Total puntos

PUNTUACIÓN TOTAL =

O abaixo asinante declara que os datos consignados neste documento aténdense acreditados coa documentación que achega, conforme co requirido nas bases da convocatoria.

En __________________, a_______ de________________de __________

Sinatura:

ALCALDE DO CONCELLO DE CHANDREXA DE QUEIXA

Anexo III

Modelo normalizado de solicitude de participación na convocatoria para a selección e nomeamento como persoal funcionario interino por programa dun/ha arquitecto/a para o Concello de Chandrexa de Queixa.

1. Datos da persoa solicitante:

Apelidos:______________________________________Nome: _________________________

DNI/NIE:______________________Enderezo:_______________________________________

Poboación:_____________________________________ Provincia:______________________

Teléfono móbil:______________________ Teléfono fixo:_______________________________

Correo electrónico: ____________________________________________________________

2. Solicito ser admitido/a na convocatoria para a selección e nomeamento como persoal funcionario interino por programa dun/ha arquitecto/a para o Concello de Chandrexa de Queixa.

3. Documentación que achego:

• Diploma ou certificado polo que se acredite o coñecemento do idioma galego Celga 4 ou superior.

• Copia compulsada da titulación e requisitos esixibles.

• Méritos que se alegan en fase de concurso.

4. Documentación que xa consta en poder do Concello de Chandrexa de Queixa (se fora o caso, indíquese de que documentación se trata nunha folla á parte e sinálense a data e o procedemento no que foi achegada).

5. Consinto expresamente que o Concello de Chandrexa de Queixa poida obter electronicamente nas redes corporativas e/ou plataformas de intermediación de datos das administracións públicas os documentos ou informacións indicados na base 4.ª da convocatoria.

6. Consinto expresamente que o Concello de Chandrexa de Queixa publique o meu nome completo.

En ......,......, a ….. de ......................... de 2026.

Fdo.:………………………………

ALCALDE DO CONCELLO DE CHANDREXA DE QUEIXA

Chandrexa de Queixa, 30 de setembro de 2026. O alcalde.

Asdo.: Francisco Rodríguez Rodríguez.

R. 2.345