I. DEPUTACIÓN PROVINCIAL DE OURENSE

DEPUTACIÓN PROVINCIAL DE OURENSE

Convocatoria dunha edición do Curso de manexo de ferramentas Webex aplicadas ao traballo nas administracións públicas (AF-09-2026)

Publícase que, por resolución da Presidencia do 03/09/2026 e núm. 2026/12975, se acordou o seguinte:

“A Deputación Provincial de Ourense deseña anualmente o seu Programa de formación continua de carácter agrupado, destinado a realizar de diversas accións formativas dirixidas ao persoal da Administración local da provincia.

No plan correspondente ao ano 2026 prevese, entre outras accións, levar a cabo unha edición do Curso de manexo de ferramentas Webex aplicadas ao traballo nas administracións públicas. A competencia para a convocatoria da dita acción correspóndelle á Presidencia, de conformidade co artigo 34.1 da Lei de bases de réxime local, e o seu exercicio atópase delegado na vicepresidenta primeira e deputada delegada de Recursos Humanos por Resolución do 3 de agosto de 2023 (BOP do 11 de agosto de 2023).

Polo exposto, dispoño:

Primeiro. Aprobar as bases xerais da acción formativa que se relaciona a continuación, segundo a proposta formulada pola Sección de Formación da Deputación de Ourense que figura no expediente, e convocar o seguinte curso de formación continua:

Curso de manexo de ferramentas Webex aplicadas ao traballo nas administracións públicas (AF-09-2026)

Bases xerais:

Primeira. Solicitudes de participación.

1. O persoal que desexe participar neste curso de formación presentará cuberta, en todos os epígrafes que lle corresponda, a instancia segundo o modelo oficial de solicitude de inscrición publicada no anexo II.

2. Todas as instancias deberán contar co correspondente informe, sobre a asistencia ao curso, do/a xefe/a do servizo ou departamento ao que pertenza o/a solicitante, para os efectos, entre outros, de confirmar a súa condición de traballador/a público/a local, e ir acompañadas da documentación complementaria que se establece na convocatoria.

3. A falsidade ou ocultación de datos esenciais para a selección dos aspirantes dará lugar á exclusión automática do curso solicitado e á imposibilidade de participar en ningunha outra actividade convocada pola Deputación de Ourense durante o prazo dun ano contado a partir da data da infracción.

4. As solicitudes de participación deberán remitirse á Sección de Formación da Deputación Provincial, mediante a súa presentación electrónica no Rexistro Xeral de documentos da Deputación de Ourense, dispoñible na sede electrónica da Deputación (sede.depourense.gal), ou en calquera dos lugares previstos no artigo 16.4 da Lei 39/2015, do 1 de outubro.

5. Non se admitirán as solicitudes de inscrición que non teñan cubertas todas as súas epígrafes de maneira correcta e lexible, ou ben que non conten coas sinaturas e co selo requiridos.

6. A presentación dunha solicitude supón a aceptación expresa das bases xerais e das normas específicas de participación e asistencia que rexen e regulan as diferentes actividades formativas da Deputación de Ourense.

Segunda. Acceso ás actividades.

1. Poderá participar nesta actividade o persoal da Administración local en activo ao que vai dirixido o curso como destinatario/a da acción formativa que cumpra os requisitos específicos esixidos na convocatoria.

2. Daráselles preferencia para accederen ao curso aos/ás traballadores/as das entidades locais adheridas ao Programa de formación continua da Deputación de Ourense do ano 2026. Así mesmo, de xeito complementario poderá acceder ao curso, nas prazas vacantes, o persoal ao servizo da Administración estatal e autonómica.

3. No acceso ás actividades formativas e en cumprimento do establecido nos artigos 48 da LEPG e 59 do TRLEBEP, reservarase o 7 % das prazas para persoas con diversidade funcional.

Terceira. Selección das persoas participantes.

1. Os criterios que se aplicarán para a selección dos/das participantes son:

* A relación existente entre as funcións ou tarefas que realiza o/a solicitante no seu posto de traballo e a materia ou contidos obxecto do curso.

* A clase de persoal á que pertenza o/a solicitante, así como o seu grupo/categoría profesional, daráselle preferencia ao persoal fixo sobre o contratado.

* A data de ingreso do/da traballador/a na Administración pública; no acceso ao curso daráselle preferencia ao persoal de maior antigüidade.

2. Cando dende un mesmo departamento ou servizo se remitan varias solicitudes, e sexa preciso realizar unha selección dos/das participantes, unha vez rematado o prazo de presentación de solicitudes os responsables do persoal de cada departamento ou servizo deberán de informar por escrito, cando así se lles requira, sobre a priorización da admisión dos/das solicitantes.

3. A lista de persoas seleccionadas será aprobada por resolución da Presidencia e exposta oficialmente na sede electrónica da Deputación de Ourense, unha vez rematado o prazo de presentación de solicitudes; ao mesmo tempo, os/as peticionarios/as poderán obter información sobre a súa admisión chamando ao teléfono: 988 317 580.

4. Dende a Deputación Provincial poderá comunicárselles telefonicamente ás persoas seleccionadas que foron admitidas, co fin de obter a confirmación sobre a súa participación na acción formativa. A renuncia dos/das participantes admitidos/as que non poidan efectuar o curso por diferentes motivos deberá formalizarse sempre por escrito.

5. Os/as solicitantes admitidos/as que non comuniquen oficialmente que non van asistir como mínimo cun día de antelación ao inicio do curso, sen causa excepcional que o xustifique, ou que abandonen a actividade formativa sen xustificación, quedarán excluídos/as de participar en calquera outra actividade de formación durante o prazo dun ano dende esa data.

Cuarta. Diplomas de aproveitamento.

1. Outorgaráselles o correspondente diploma de aproveitamento aos/ás alumnos/as que participen con regularidade e bo aproveitamento no desenvolvemento do curso e que superen satisfactoriamente os diferentes módulos e as probas de avaliación do curso.

2. É obrigatoria a asistencia e a puntualidade a todas as sesións presenciais do curso e a realización de todos os módulos e probas que integran o curso. Toda non asistencia á clase deberá ser debidamente xustificada polo/a interesado/a, sen exceder nunca o 15 % das horas lectivas do curso. Unha non asistencia ás clases presenciais superior ao 15 % da duración da acción formativa, aínda que sexa xustificada, impedirá a expedición do diploma de aproveitamento correspondente.

Quinta. Modificacións.

A Deputación de Ourense poderá variar, se fose preciso e a favor da eficacia da acción formativa, as características e mais os contidos do curso para adaptalos ás necesidades da Administración ou ás distintas continxencias que poidan xurdir, e buscará sempre as condicións óptimas para a realización da acción formativa.

Anexo I

Curso de manexo de ferramentas Webex aplicadas ao traballo nas administracións públicas (AF-09-2026)

1. Persoas destinatarias.

* Persoal técnico e administrativo ao servizo da Administración Local, con coñecementos informáticos básicos e que precise completar a súa formación xeral nesta área.

* Traballadores/as das entidades locais da provincia que no seu posto empreguen Webex como ferramenta de comunicación.

2. Desenvolvemento.

2.1. Modalidade da acción formativa: presencial.

2.2. Duración: 30 horas.

2.3. Datas de realización: do 29 de setembro ao 5 de novembro do 2026.

2.4. Sesións presenciais: 29 de setembro, 1-6-8-13-15-20-22-27-29 de outubro e 3-5 de novembro de 2026; 12 días lectivos.

2.4. Prazas: 20 participantes.

2.5. Número de edicións: unha.

3. Obxectivos.

* Instruír ao persoal das entidades locais no uso de Webex para que sexan capaces de planificar, xestionar e dirixir as reunións e os eventos virtuais a través de Cisco Webex, para garantir a seguridade da información, o cumprimento da normativa institucional e unha comunicación fluída e profesional tanto co cidadán como con outros organismos públicos.

* Formar os/as participantes para que saiban configurar e personalizar a interface para adaptar o perfil e a contorna de Webex á identidade corporativa institucional.

* Aplicar correctamente os protocolos de seguridade da administración (bloqueo de reunións, salas de espera, contrasinais seguros e xestión dos roles de organizador/coorganizador) para garantir a seguridade das sesións.

* Formar os empregados públicos na importancia de xestionar a privacidade, controlando de forma estrita os permisos de gravación e o almacenamento de datos na nube institucional segundo a normativa de protección de datos vixente.

* Integrar Webex coas ferramentas de calendario como Outlook ou correo corporativo para programar reunións ordinarias e extraordinarias.

* Instruír os/as participantes para que sexan quen de resolver os problemas técnicos básicos, como poden ser as incidencias comúns de audio, o vídeo e a conectividade durante o directo sen interromper o ritmo da sesión.

4. Programa.

4.1. Introdución as ferramentas Webex e á colaboración dixital na Administración pública.

4.2. Configuración da conta e personalizar a contorna de traballo.

4.3. Webex Meetings: creación, programación e xestión de reunións.

4.4. Ferramentas de interacción: chat, reaccións, enquisas e sesións de grupo.

4.5. Webex App: mensaxaría, espazos colaborativos e xestión de equipos.

4.6. Compartición e organización de documentos e recursos.

4.7. Integración de Webex con aplicacións de produtividade e servizos corporativos.

4.8. Seguridade, privacidade e protección de datos no uso de Webex.

4.9. Resolución de incidencias e soporte básico aos usuarios.

4.10. Casos prácticos de comunicación, coordinación e traballo colaborativo mediante Webex.

5. Prazo de presentación de solicitudes.

O prazo de presentación das solicitudes para participar nesta acción formativa rematará o 24 de setembro do 2026.

Segundo. Ordenar a publicación no BOP e na sede electrónica da presente convocatoria, bases e anexos.”

Publícase isto, e infórmase ás persoas interesadas de que contra o dito acto poderán interpoñer un recurso de reposición, previo ao contencioso – administrativo, ante o mesmo órgano que o ditou no prazo dun mes, ou, alternativamente e de forma directa, un recurso contencioso – administrativo ante o Xulgado do Contencioso - Administrativo de Ourense (ou outro que resultase territorialmente competente en aplicación das regras establecidas no artigo 14 de la Lei reguladora da xurisdición contencioso – administrativa), no prazo de dous meses. En ningún caso poderán simultanearse ambos os recursos.

Os prazos computaranse de data a data a partir do día seguinte ao de recibir esta notificación, e vencerán no día equivalente do mes natural seguinte ou, de non existir este, no último día do dito mes. No caso de que o día de vencemento sexa inhábil, entenderase prorrogado o dito prazo ao primeiro día hábil seguinte.

Durante o mes de agosto non contará o prazo para interpoñer o recurso contencioso-administrativo, salvo para o procedemento para a protección dos dereitos fundamentais no que o mes de agosto terá carácter de hábil.

En todo caso, poderá interpoñer calquera outro recurso ou acción administrativa ou xudicial que estime procedente.

Ourense, 4 de setembro de 2026. A deputada delegada de Facenda, Economía e Recursos Humanos (Pd.: Resol. 2023/9863, do 31/07/2023).

Asdo.: Marta Nóvoa Iglesias.

(Ver solicitude páx. seguinte)

R. 2.168