IV. ENTIDADES LOCAIS

CONCELLO DE VERÍN

Resolución do concelleiro delegado da Área de Persoal, Réxime Interior, Conservatorio e Deportes nº 2026 – 1075 pola que se adxudica a praza de profesor/a de Saxofón, como persoal laboral fixo, no marco do proceso de estabilización do emprego temporal mediante o sistema de concurso

Por Resolución desta concellería delegada do 13.05.2022 aprobouse a oferta de emprego público extraordinaria para a estabilización do emprego temporal no Concello de Verín.

Por Resolución da Concellería Delegada de Persoal do 16.12.2022 aprobáronse as bases xerais reguladoras e a convocatoria dos procesos selectivos derivados da oferta de emprego publica extraordinaria.

A antedita oferta de emprego público extraordinaria foi rectificada mediante unha corrección de erros por Resolucións da Concellería Delegada da Área de Persoal os días 22 e 29 de novembro de 2022; e publicada no BOP núm. 290, do 21.12.2022.

Por Resolución do 26.04.2024 vólvese rectificar a oferta de emprego extraordinaria, publicándose no BOP núm. 123, do 26.06.2024 e no DOG 171 do día 05.09.2024 e inseríndose un extracto da convocatoria no Boletín Oficial do Estado do 03.12.2024.

Por Resolución desta concellería, do 05.02.2025, aprobouse a lista provisional de persoas admitidas e excluídas, concedéndose un prazo de dez días hábiles, contados a partir do día seguinte ao da publicación da resolución, para poder emendar, no seu caso, o defecto que motivase a exclusión.

O día 28.04.2026 publicouse a Resolución do concelleiro delegado, pola que se aprobou definitivamente a lista de persoas admitidas e excluídas para a selección dunha praza de profesor/a de Saxofón, como persoal laboral do grupo profesional I, así como a composición do tribunal de selección.

O día 29.05.2026, constituíuse o tribunal de selección na Sala de Xuntas da Deputación de Ourense, ás 11.00 horas.

De seguido, o tribunal acordou sinalar o lugar e data para realizar a valoración de méritos na forma prevista nas bases reguladoras publicadas no BOP núm. 290, do 21 de decembro de 2022, rectificadas segundo a publicación no BOP núm. 123, do 26 de xuño de 2024, para o día 3 de xuño de 2026, ás 18:30 horas, na Sala de Xuntas da Deputación, sita na rúa do Progreso, núm. 32, 32003 Ourense.

O día 3 de xuño de 2026, por unanimidade, o Tribunal realizou a valoración dos méritos das persoas aspirantes.

Unha vez finalizado o proceso selectivo, o órgano de selección publicou o resultado provisional de valoración de méritos co seguinte resultado:

Apelidos e nome	Méritos académicos (Máximo 10 puntos)	Méritos profesionais (Máximo 90 puntos)	Total puntuación
Loureiro Casas, Alberto	10	90	100
Quintas Alonso, Gerardo Israel	10	0	10

Unha vez transcorrido o prazo de dez días hábiles para a presentación de reclamacións por parte das persoas aspirantes, sen que se presentasen alegacións á lista de puntuacións finais publicada, o tribunal formulou a proposta de adxudicación da praza de profesor/a de Saxofón a favor de Alberto Loureiro Casas.

Así mesmo proponse como relación complementaria de persoas aspirantes e para a

formación dunha bolsa de contratación laboral temporal da categoría profesional de profesor/a de Saxofón, por orde de puntuación o seguinte candidato:

Apelidos e nome	DNI
Quintas Alonso, Gerardo Israel	*8617

Por delegación outorgada no Decreto da Alcaldía do 20 de xuño de 2023, modificada polo Decreto da Alcaldía do 21 de marzo de 2025.

RESOLVO:

Primeiro. Adxudicar a praza de profesor/a de Saxofón, correspondente ao proceso extraordinario de estabilización de emprego temporal, polo sistema de concurso, como persoal laboral fixo do grupo profesional I, a favor de:

Identidade do aspirante	DNI
Loureiro Casas, Alberto	*7754

Segundo. Requirirlle ao aspirante proposto para formalizar o contrato a documentación xustificativa das condicións de capacidade e requisitos esixidos na cláusula décimo primeira apartado 3 das bases:

a) Certificado médico oficial no que se acrediten os extremos sinalados na base terceira.

b) Declaración baixo a súa responsabilidade de non estar separada ou separado mediante expediente disciplinario do servizo de calquera das administracións públicas ou dos órganos constitucionais do Estado ou estatutarios das comunidades autónomas, nin atoparse en inhabilitación absoluta ou especial para empregos ou cargos públicos por resolución xudicial firme.

c) No suposto de ser nacional doutro estado, declaración xurada ou promesa de non atoparse inhabilitada ou inhabilitado ou en situación equivalente nin constar sanción disciplinaria ou equivalente que impida, no seu estado, nos mesmos termos, o acceso ao emprego público.

Ademais, deberá achegar o certificado negativo do Rexistro Central de Delincuentes Sexuais, previsto na cláusula décimo terceira das bases xerais reguladoras.

Terceiro. Notificarlle a presente resolución á persoa interesada, comunicándolle que deberá formalizar o correspondente contrato de traballo e a incorporación ao posto nos prazos establecidos na cláusula décimo segunda das bases reguladoras, “As persoas aspirantes nomeadas deberán tomar posesión no prazo máximo dun mes, contado a partir da publicación do nomeamento no Boletín Oficial da Provincia e se non o fixesen dentro do prazo sinalado, sen causa xustificada, perderán o dereito a ser nomeados como funcionarios de carreira ou persoal laboral fixo do Concello de Verín, así como todos os dereitos adquiridos en virtude do nomeamento”.

Cuarto. Publicar a presente resolución no Boletín Oficial da Provincia de Ourense, na sede electrónica deste concello [dirección https://verin.sedelectronica.gal/info.0], e no taboleiro de anuncios para maior difusión.

Quinto. Informar da presente resolución á Intervención e a Tesourería municipais para os efectos de practicar as anotacións contables que procedan.

Este decreto asínase para os efectos de fe pública e non da legalidade pola secretaria interina, ao abeiro do artigo 3.2 h) RD 128/2018, do 16 de marzo.

Verín, 6 de agosto de 2026.

R. 2.013