I. DEPUTACIÓN PROVINCIAL DE OURENSE

DEPUTACIÓN PROVINCIAL DE OURENSE

Convocatoria e bases de selección para a formación dunha bolsa de nomeamentos de persoal funcionario interino/contratación laboral interina da categoría profesional de xestor/a de Administración xeral (subgrupo A2) ao servizo da Deputación Provincial de Ourense para o nomeamento de persoal funcionario interino ou contratación laboral interina ao servizo do Inorde

Convocatoria e bases de selección para a formación dunha bolsa da categoría profesional de xestor/a de Administración xeral (subgrupo A2) ao servizo da Deputación Provincial de Ourense.

Para os efectos oportunos publícase que no día da data, esta presidencia ditou o seguinte decreto:

“Unha vez vista a solicitude do xefe da Sección de Planificación, Patrimonio e Programas de Cooperación en relación coas necesidades de persoal para cumprir o Convenio entre o Ministerio para a Transición Ecolóxica e o Reto Demográfico e a Deputación de Ourense para o desenvolvemento do Centro de Innovación Territorial do 20 de marzo de 2026,

Unha vez visto o informe favorable do xefe do Servizo de Recursos Humanos e Formación, relativo ao cumprimento do establecido na dita ordenanza, así como ao cumprimento da normativa actual que rexe para a contratación de persoal no sector público,

Unha vez visto o informe favorable da Comisión de Control e Seguimento na súa reunión do 17 de xuño de 2026, sobre a proposta de bases reguladoras para o dito procedemento,

De conformidade co establecido na Ordenanza reguladora dos procedementos de selección de persoal funcionario interino e laboral temporal ao servizo da Deputación Provincial de Ourense publicada no Boletín Oficial da Provincia do 30 de xullo de 2020, así como o establecido no artigo 20 punto cinco, apartado 1 da Lei 31/2022, do 23 de decembro, de orzamentos xerais do Estado para o ano 2023.

Polo exposto, formúlase a seguinte proposta de resolución:

1.º) Aprobar a convocatoria e bases reguladoras do procedemento para a formación dunha bolsa de nomeamentos de persoal funcionario interino/contratación laboral interina da categoría profesional de xestor/a de Administración (subgrupo A2) ao servizo da Deputación Provincial de Ourense e do Inorde, e debendo publicarse na forma regulamentaria.

Base primeira. Obxecto da convocatoria

De conformidade co disposto na Ordenanza provincial reguladora dos procedementos de selección de persoal funcionario interino e laboral temporal ao servizo da Deputación Provincial de Ourense, aprobada na sesión plenaria do 30 de xullo de 2021 e publicada no Boletín Oficial da Provincia do 8 de outubro de 2021 é obxecto destas bases a regulación do proceso selectivo e a convocatoria para a formación dunha bolsa de nomeamentos de persoal funcionario interino/contratación laboral interina da categoría de xestor/a de Administración xeral ao servizo da Deputación Provincial de Ourense e do Inorde.

O procedemento de selección previsto no artigo 4.º da Ordenanza, para a selección de persoal laboral temporal desta categoría profesional correspondente ao subgrupo de titulación A2 é o de concurso-oposición.

Base segunda. Requisitos dos/as aspirantes

Os requisitos dos/as aspirantes serán os seguintes:

a) Nacionalidade: ter a nacionalidade española. Ademais, e consonte co establecido na Lei 17/1993, do 23 de decembro, poderán acceder os nacionais dos demais estados membros da Unión Europea, así como os/as estranxeiros/as que reúnan a condición de cónxuxes de españois ou de nacionais doutros Estados membros da Unión Europea, sempre que non estean separados de dereito, e os seus descendentes e os do seu cónxuxe- sempre que non estean separados de dereito- menores de 21 anos ou maiores que vivan ás súas expensas. As mesmas regras aplicaranse, de ser o caso, ás persoas incluídas no ámbito de aplicación dos tratados internacionais realizados pola Comunidade Europea e ratificados por España, nos que sexa de aplicación a libre circulación de traballadores. Ademais das persoas sinaladas no parágrafo anterior, os/as estranxeiros/as que se atopen residindo legalmente en España, de acordo co previsto no artigo 10.2 da vixente Lei orgánica de dereitos e liberdades dos/as estranxeiros/as en España.

b) Idade: ter cumpridos dezaseis anos e non exceder a idade máxima de xubilación forzosa.

c) Titulación: título universitario de grao ou calquera outro título oficial universitario con nivel, como mínimo, 2 do Marco Español de Cualificacións para a educación superior (nivel 6 do Marco Europeo de Cualificacións) en calquera rama do coñecemento.

Cando se aleguen equivalencias de títulos achegarase no seu día o certificado para o efecto da Consellería de Educación e Ordenación Universitaria. No caso de titulacións obtidas no estranxeiro, deberán posuír o documento que acredite fidedignamente a súa homologación.

Así mesmo estar en posesión do título que acredite o grao de perfeccionamento no idioma galego ou Celga 4. Os/as aspirantes que non dispoñan de tal título e superasen a proba práctica deberán facer un exercicio de dúas traducións unha do galego o castelán e outra do castelán ao galego, cualificándose como apto ou non apto. O tribunal decidirá a nota mínima para ser declarado apto.

d) Capacidade funcional: non padecer enfermidade nin estar afectado por limitación física ou psíquica incompatible co desempeño das correspondentes funcións.

e) Habilitación: non ter sido separado mediante expediente disciplinario do servizo de calquera das administracións públicas ou dos órganos constitucionais ou estatutarios das comunidades autónomas, nin atoparse en inhabilitación absoluta ou especial para empregos ou cargos públicos por resolución xudicial para o acceso ao corpo ou escala de funcionario, ou para exercer función similares ás que desempeñaban no caso do persoal laboral, no que fose separado ou inhabilitado. No suposto de ser nacional doutro Estado, non atoparse inhabilitado ou en situación equivalente nin ter sido sometido a sanción disciplinaria ou equivalente que impida, no seu Estado, nos mesmos termos, o acceso ao emprego público.

Base terceira. Lugar e presentación de instancias

1. As instancias solicitando tomar parte na convocatoria, na que os/as aspirantes deberán manifestar que reúnen todas e cada unha das condicións esixidas, referidas sempre á data de expiración do prazo sinalado para a presentación de instancias, dirixiránselle ao presidente da Deputación. As modalidades de presentación son as seguintes:

a) De forma presencial, mediante a presentación en papel da solicitude e da documentación anexa na Oficina de Asistencia ao Cidadán en materia de Rexistro da Deputación Provincial de Ourense ou en calquera dos lugares previstos no artigo 16.4 da Lei 39/2015, do 1 de outubro, do procedemento administrativo común das administracións públicas. Neste último caso rógase que se envíe a copia da instancia vía e-mail ao enderezo electrónico persoal@depourense.gal

b) De forma telemática, a través do rexistro electrónico xeral da sede electrónica da Deputación Provincial, no enderezo https://sede.depourense.es

2. O prazo será de 7 días naturais contados a partir do seguinte ao da publicación desta convocatoria no Boletín Oficial da Provincia.

3. Coa instancia (modelo normalizado que se inclúe na convocatoria e que estará dispoñible na sede electrónica da Deputación Provincial de Ourense https://sede.depourense.es) acompañaranse os documentos acreditativos dos méritos aos que fai referencia a fase de concurso e o xustificante de pago da taxa de participación no proceso selectivo.

4. Os requisitos de estar en posesión da titulación esixida, así como os datos de identidade, nacionalidade e residencia serán acreditados xunto coa solicitude. No caso de non achegarse, serán comprobados de oficio pola Deputación mediante consulta ás plataformas de intermediación de datos das administracións públicas, sempre que, conforme ao Regulamento (UE) 2016/679 do Parlamento Europeo e do Consello Europeo do 27 de abril de 2016, relativo á protección dos datos das persoas físicas, os solicitantes farán constar o seu consentimento expreso na solicitude. En caso contrario, os/as interesados/as deberán achegar a copia dos documentos correspondentes. Excepcionalmente, se a Deputación non puidese obter os documentos conforme ao previsto neste apartado, poderá solicitar ao interesado a súa achega, outorgándolle un prazo de 10 días hábiles.

5. En todo caso, os documentos obtidos utilizaranse exclusivamente para as finalidades deste procedementos selectivo. Os interesados poderán exercer en calquera momento os dereitos que lles recoñece a normativa vixente en materia de protección de datos.

6. Para a admisión do ao concurso dos solicitantes, será requisito imprescindible o previo aboamento da taxa establecida na presente Ordenanza fiscal (BOP N.º 166, do 20 de xullo de 2018), agás no supostos de exención. A tarifa aplicable nesta convocatoria será: 17 €, para o subgrupo A2. O modelo estará dispoñible na sede electrónica da Deputación de Ourense:

https://sede.depourense.es

No caso de que o interesado estea exento por discapacidade igual ou superior ao 33 %, deberá acreditar esta circunstancia mediante a certificación acreditativa expedida polo Instituto Nacional da Seguridade Social.

No caso de que o interesado estea exento por ter a condición de desempregado de longa duración (considerando como tal á persoa que leve inscrita no Servizo Público de Emprego os 12 últimos meses ininterrompidamente, ou un período de 12 meses con interrupción, dentro dos últimos 18 meses), deberá achegar a certificación desta situación expedida polo servizo público de emprego.

No caso de que o interesado forme parte dunha familia numerosa e se acolla á bonificación do 50 % no pago da taxa, deberá achegar a copia do título de familia numerosa expedida pola Consellería de Política Social da Xunta de Galicia.

Base cuarta. Listas provisionais e definitivas

Unha vez expirado o prazo de presentación de instancias, o presidente da Deputación ditará a resolución no prazo máximo de cinco días naturais declarando aprobada a lista de admitidos/as e excluídos/as. Na devandita resolución que se publicará na sede electrónica da Deputación Provincial de Ourense https://sede.depourense.es indicarase a causa da exclusión, concedendo un prazo de dez días hábiles para a emenda de erros, incluíndo ademais a designación dos membros do tribunal de selección. Unha vez resoltas as ditas reclamacións, convocarase – mediante un anuncio na sede electrónica da Deputación Provincial de Ourense https://sede.depourense.es a data de realización da proba práctica que se fixe e a de valoración dos méritos achegados que terá carácter previo á realización da proba práctica.

Base quinta. Procedemento de selección

O procedemento de selección será, de conformidade co previsto no artigo 4.1 da Ordenanza reguladora dos procedementos de selección de persoal funcionario interino e laboral temporal ao servizo da Deputación Provincial de Ourense, o concurso-oposición.

A fase de concurso será previa á de oposición, non terá carácter eliminatorio e non poderá supoñer nunca máis do 40 % do total da puntuación. A valoración dos méritos será obxecto de publicación na sede electrónica da Deputación no prazo máximo de cinco días hábiles dende a data da súa realización, agás que concorran causas excepcionais que o impidan, suposto no que, trala autorización expresa previa da Presidencia, poderá prorrogarse o dito prazo ata un máximo de dez días naturais.

Base sexta. Tribunais de selección

1. O tribunal de selección estará formado por seis membros, integrándose por un presidente, catro vogais e un secretario que actuará con voz pero sen voto. Designaranse ademais dun mínimo de un suplente por cada membro titular do tribunal

2. Os membros do tribunal deberán ter a condición de funcionario de carreira de calquera Administración pública. A súa composición será estritamente técnica e deberán posuír unha titulación académica que acredite coñecementos nas materias que sexan obxecto da praza.

3. Na medida do posible tenderase a respectar a paridade na súa composición de conformidade co establecido no artigo 59 da Lei do emprego público de Galicia, no artigo 60 do Estatuto básico do empregado público e seguindo as instrucións previstas no artigo 8 da Ordenanza.

4. O secretario do tribunal será designado pola Presidencia, entre funcionarios do Servizo de Recursos Humanos da Deputación Provincial.

5. Contra os acordos do tribunal, as persoas aspirantes poderán interpoñer, con carácter potestativo, unha reclamación no prazo de 3 días hábiles, contados a partir do seguinte á data da súa publicación na sede electrónica da Deputación de Ourense https://sede.depourense.es. O prazo quedará suspendido se a persoa aspirante solicita que se lle poña de manifesto o expediente, polo prazo que transcorra entre a solicitude e o día no que se lle poña de manifesto, establecéndose o prazo máximo de suspensión en 10 días hábiles.

6. As reclamacións deberán ser resoltas polo tribunal de selección debendo ser publicadas na sede electrónica da Deputación de Ourense https://sede.depourense.es, sen prexuízo da súa notificación ás persoas reclamantes.

7. Contra a desestimación das reclamacións indicadas poderase interpoñer un recurso de alzada ante a Presidencia no prazo dun mes contado a partir do seguinte ao da súa notificación ou publicación.

Base sétima. Baremo de méritos

1. Con carácter previo á fase de oposición o tribunal debe realizar a valoración do correspondente concurso co seguinte baremo:

a) Polos servizos prestados na mesma ou análoga categoría profesional: 0,15 puntos por mes ou fracción. Entenderase por categoría profesional análoga aquela coa que a prevista nas bases garde unha relación de identidade esencial. O cómputo realizarase sumando o tempo total de servizos prestados expresado en días e dividíndoo por trinta, aplicándolle ao cociente resultante o coeficiente de puntuación que corresponda segundo o baremo.

Non se computarán como servizos prestados os traballos realizados por conta propia baixo o réxime de cotización correspondente ao non ter necesariamente a consideración de homoxéneos respecto dos realizados a través da xornada laboral por conta allea.

Puntuación máxima por experiencia laboral: 12 puntos.

b) Por cada curso realizado, impartido por administracións públicas, universidades, INEM, formación continua no marco do acordo de formación continua para as administracións públicas ou formación ocupacional, relacionado coas funcións para desenvolver:

- Por cursos de 20 a 59 horas: 0,5 puntos por curso.

- Por cursos de 60 a 99 horas: 0,75 puntos por curso.

- Por cursos de 100 ou máis horas: 1 punto por curso.

Puntuación máxima por cursos: 8 puntos.

Puntuación máxima fase de concurso: 20 puntos.

2. Os méritos deberán acreditarse a través dos seguintes medios:

- A antigüidade na Administración pública, mediante certificación expedida polo órgano competente da Administración pública de que se trate.

- Os servizos prestados no sector privado, mediante certificación de vida laboral e contratos de traballo.

- Os cursos de formación, mediante certificado expedido pola entidade promotora da acción formativa, onde conste a denominación do curso e o seu número de horas. A certificación deberá incluír ademais a circunstancia de ter superado a proba de avaliación establecida para a obtención do diploma ou certificación, de ser o caso.

Para o caso dos cursos realizados ou impartidos por entidades distintas das sinaladas no punto 1.b) anterior, regulados ao abeiro de normativa ou regulación dunha Administración pública, deberá constar no certificado ou diploma acreditativo, a homologación ou acreditación realizada pola Administración pública correspondente, para ser considerado válido aos efectos de baremación.

Base oitava. Proba práctica

1. A proba práctica estará relacionada de xeito directo coas funcións do posto de traballo de xestor/a de Administración xeral ao servizo da Deputación Provincial de Ourense, así como no temario previsto no Anexo III das presentes bases. Será determinada polo tribunal de selección na mesma data da súa realización, no marco do previsto nestas bases. As actuacións desenvolvidas na reunión na que se estableza o contido da proba para realizar recolleranse na acta correspondente.

2. En caso de que o tribunal o estimase necesario, polas especiais características do posto, poderá solicitar previamente a contratación e/ou asistencia dun/unha asesor/a técnico/a especializado/a para realizar e avaliar a proba selectiva.

3. As funcións do posto de xestor/a de Administración Xeral son as seguintes:

Prestar asistencia técnico – administrativa directa e de carácter operativo no ámbito da xestión do servizo correspondente, no eido da súa capacitación profesional e competencial.

Asistir e asesorar ao seu superior na elaboración dos planos e programas de disposición de fondos.

Prestar asesoramento, no eido das súas funcións, cando así sexa requirido dende as diferentes áreas ou servizos, de acordo coa súa formación e capacitación profesional.

Emisión de informes, dentro do seu eido competencial e profesional.

Realizar as tarefas de asistencia ás entidades locais.

Calquera outra de similar natureza, sempre que resulte adecuada á súa clasificación, grao ou categoría, e propia da área, servizo ou negociado no que se integra o posto.

4. Valorarase a formación e o grao de coñecementos amosados no desenvolvemento da proba. O tempo de desenvolvemento será de dúas horas. A puntuación máxima que se pode outorgar a proba práctica será de 30 puntos (equivalente ao 60% da puntuación máxima alcanzable no proceso selectivo). A puntuación necesaria para superar esta fase será a metade da máxima establecida. Pódese utilizar lexislación.

A corrección da proba levarase a cabo e será obxecto de publicación na sede electrónica da Deputación no prazo máximo de cinco días hábiles, agás que concorran causas excepcionais que o impidan, suposto no que, trala autorización expresa previa da Presidencia, poderá prorrogarse o dito prazo ata un máximo de dez días naturais. Nesta mesma publicación, incluirase a proposta de resolución formulada polo tribunal.

Base novena. Procedemento para a formación da bolsa de nomeamentos interinos/contratación laboral interina

Unha vez concluída a fase de concurso-oposición, o tribunal formulará unha proposta de bolsa de nomeamentos de funcionarios interinos/contratación laboral interina, conforme ás seguintes regras:

1. A orde da lista virá determinada pola puntuación obtida polas persoas participantes nas fases de concurso e oposición, tendo en conta que deberá estar superada a fase de oposición, obtendo como mínimo a metade da puntuación máxima establecida para a proba práctica.

2. De producirse empate na puntuación, a orde de desempate establecerase do xeito seguinte:

pola maior puntuación no apartado a) do baremo; no seu defecto, pola maior puntuación no apartado b). De persistir o empate, por orde alfabética, a partir da letra inicial que resulte do último sorteo anual efectuado pola Xunta de Galicia para os seus procesos selectivos.

3. Non obstante o anterior, e para cumprir coa reserva do 7 % dos postos ao seu favor, as persoas con discapacidade terán dereito a un de cada quince postos da bolsa, aínda que a súa puntuación corresponda cun posto inferior. Esta regra non será de aplicación cando a puntuación obtida xa lle dea dereito a un posto en cada quincena da lista.

4. O tribunal publicará a proposta na sede electrónica da Deputación de Ourense https://sede.depourense.es e elevaraa á Comisión de Control e Seguimento prevista no artigo 9 da Ordenanza reguladora dos procedementos de selección de persoal funcionario interino e laboral temporal ao servizo da Deputación Provincial de Ourense, para a emisión do informe preceptivo.

5. Unha vez emitido o informe pola Comisión de Control e Seguimento, se este fose desfavorable á proposta do tribunal, devolveráselle o expediente a este, co fin de que emita o informe ao respecto que considere oportuno.

Emitidos os informes da Comisión de Control e Seguimento, e, se é o caso, do tribunal, aos que se alude no parágrafo anterior, a Presidencia resolverá conforme coa proposta deste último, agás que, de xeito motivado, considere que a dita proposta infrinxe as bases reguladoras ou a normativa vixente. Neste suposto, a Presidencia requirirá do tribunal a formulación dunha nova proposta na que se emenden as deficiencias advertidas.

O tribunal, motivándoo suficientemente, poderá manter a súa proposta orixinal, que vinculará á Presidencia, sen prexuízo da potestade dos órganos da administración provincial de acordar a declaración de lesividade ou a revisión de oficio da resolución de que se trate, cando se estime procedente conforme coa lexislación aplicable.

6. A resolución da Presidencia será obxecto de publicación no Boletín Oficial da Provincia e na sede electrónica da Deputación, entrando en vigor coa publicación no Boletín.

Base décima. Procedemento para o nomeamento/contratación das persoas integrantes da bolsa

1. Unha vez producida a necesidade de cobertura temporal dun posto e previamente á realización de calquera nomeamento interino/contratación laboral interina será preceptiva a tramitación prevista no artigo 3 da Ordenanza reguladora dos procedementos de selección de persoal funcionario interino e laboral temporal ao servizo da Deputación Provincial de Ourense.

2. Unha vez realizados os trámites sinalados, a Presidencia acordará o nomeamento interino/contratación laboral interina da persoa á que lle corresponda pola súa orde na bolsa.

3. A mera integración na bolsa para a contratación de duración determinada non dará lugar á existencia de relación laboral ningunha coa Deputación, senón unicamente o dereito a ser nomeado/contratado nos supostos nos que a Deputación Provincial aprecie a existencia da necesidade de realizar nomeamentos/contratos para postos reservados á bolsa de referencia, nos termos e condicións que sinale a Administración provincial conforme ao establecido no artigo 3 da Ordenanza.

4. Os chamamentos faranse mediante un anuncio na sede electrónica da Deputación de Ourense. No prazo máximo de dous días hábiles seguintes á publicación do chamamento, a persoa aspirante deberá presentar nas oficinas do Servizo de Recursos Humanos da Deputación para a formalización do correspondente nomeamento/contrato os seguintes documentos:

a) Certificado acreditativo de non padecer enfermidade ou defecto físico que impida o normal exercicio da función a desempeñar.

b) Declaración xurada ou promesa de non ser separado/a mediante procedemento disciplinario de ningunha Administración Pública, nin estar inhabilitado/a para o exercicio de funcións públicas.

Dende o Servizo de Recursos Humanos xestionarase a realización dun exame médico do/a aspirante, a cargo do Servizo de Medicina do Traballo da Deputación, co fin de acreditar que o aspirante posúe capacidade funcional para o desempeño das tarefas propias da categoría. Entenderase que se posúe a dita capacidade funcional cando non se padeza enfermidade nin se estea afectado por limitación física ou psíquica que sexa incompatible co desempeño das correspondentes funcións. O sometemento ao exame médico é obrigatorio para o/a aspirante, e o seu rexeitamento dará lugar á exclusión das listas.

No caso de rexeitamento ao chamamento, ou de non cumprimentarse polo/a interesado/a os trámites sinalados no prazo indicado e coa achega da documentación sinalada, así como nos supostos en que o exame médico acredite que o/a aspirante non posúe capacidade funcional para o desempeño das tarefas propias da categoría, ditarase unha resolución pola que se declare a imposibilidade de realizar o nomeamento (que en todo caso será obxecto de notificación individualizada ao/á afectado/a). Nesta resolución acordarase ademais a exclusión do/a aspirante decaído/a da lista con carácter definitivo, agás que o incumprimento ou imposibilidade do nomeamento estea motivado por causa de forza maior debidamente acreditada ou que se acredite a imposibilidade temporal de aceptar o chamamento pola concorrencia de circunstancias especiais que motivasen unha baixa regulada para un traballador activo da Deputación.

Para estes efectos, considerarase como causa de forza maior eximente da obriga de aceptar a contratación o atoparse o/a aspirante traballando noutra Administración pública ou empresa, ou na propia administración provincial. Simultánea ou sucesivamente á dita resolución, chamarase ao/á seguinte integrante da lista que corresponda.

5. Realizarase un nomeamento interino/contratación laboral interina na categoría correspondente no prazo de cinco días naturais desde a data da notificación do chamamento.

6. A medida que se vaian producindo os cesamentos, as persoas nomeadas pasarán a ocupar de novo o posto que consonte coa puntuación obtida lles corresponda na lista, podendo volver ser nomeadas se xurdise a necesidade.

7. Nos supostos nos que xurdise a necesidade dun nomeamento para un posto dos reservados á lista, e todos os integrantes da dita lista tivesen nomeamentos en vigor coa Deputación Provincial, realizarase unha convocatoria específica para ampliación da bolsa, que se tramitará de forma urxente, reducíndose á metade os prazos previstos para este procedemento. Non obstante, poderá empregarse o procedemento excepcional de urxencia se concorren os requisitos establecidos no artigo 7 da Ordenanza

8. A bolsa terá un prazo de vixencia de dous anos, que contarán desde a publicación da súa aprobación no BOP, debendo cubrirse obrigatoriamente as necesidades de persoal temporal da Deputación Provincial para os postos de traballo aos que se refire mediante o nomeamento directo das persoas incluídas, seguindo a súa orde de colocación na bolsa.

Base undécima: recursos

Contra a resolución que aproba estas bases, que pon fin á vía administrativa, poderase interpoñer un recurso potestativo de reposición ante esta Presidencia, no prazo dun mes contado desde o día seguinte ao da súa publicación no Boletín Oficial da Provincia de Ourense, ou poderase impugnar directamente ante a Sección do Contencioso-Administrativo do Tribunal de Instancia de Ourense (ou outro que resultase territorialmente competente en aplicación das regras establecidas no artigo 14 da Lei reguladora da xurisdición contencioso-administrativa), no prazo de dous meses, contados desde a mesma data. Non poderán simultanearse ambos os recursos.

Sen prexuízo do anterior, os interesados poderán interpoñer calquera outro recurso ou reclamación que estimen oportuna.

O presidente da Deputación Provincial de Ourense.

SOLICITUDE PARA PARTICIPAR NO PROCESO SELECTIVO PARA A CREACION DUNHA BOLSA DE NOMEAMENTOS DE PERSOAL FUNCIONARIO INTERINO/CONTRATACIÓN LABORAL INTERINA DA CATEGORÍA DE XESTOR/A DE ADMINISTRACIÓN XERAL AO SERVIZO DA DEPUTACIÓN PROVINCIAL DE OURENSE E DO INORDE

ANEXO I

I. Datos do/a solicitante:

APELIDOS: __________________________________________________________________

NOME: ________________________________________DNI/NIE: ______________________

ENDEREZO: _________________________________________________________________

POBOACIÓN: ________________________________PROVINCIA: _____________________

TELÉFONO MÓBIL: ________________________ TELÉFONO: ________________________

CORREO ELECTRÓNICO: ______________________________________________________

II. Solicito a miña inclusión para participar no proceso selectivo para a creación dunha bolsa de nomeamentos de persoal funcionario interino/contratación laboral interina na/s seguinte/s categoría/ profesional/s (o/a aspirante deberá marcar a/as categorías ás que desexa presentarse.)

Xestor/a de Administración xeral (A2)

III. Documentación que achego:

- DNI

- Titulación universitaria

- Diploma ou certificado polo que se acredita o grao de perfeccionamento do idioma galego Celga 4

. Xustificante do pago da taxa de procesos selectivos (subgrupo A2-17 €) ou de cumprir os requisitos de bonificación ou exención da taxa, de se-lo caso.

- Xustificante dos méritos alegados

SI	CONSINTO EXPRESAMENTE que a Deputación Provincial de Ourense poida obter electronicamente nas redes corporativas e/ou plataformas de intermediación de datos das AAPP, os documentos ou informacións indicados na base 3.ª punto 4 da convocatoria.
NON

SI	AUTORIZO a Deputación Provincial de Ourense para que me sexa enviado por vía de correo electrónico ou SMS a comunicación de aviso da publicación na sede electrónica da Deputación dos diferentes actos e resolución de interese para a miña solicitude.
NON

___________, ____ de _____________ de 20__

Sinatura

Anexo relativo ao réxime de protección dos datos persoais achegados coa solicitude: Os datos persoais achegados coa presente solicitude incorporaranse ás correspondentes actividades de tratamento da Deputación Provincial de Ourense e serán tratados coa/s finalidade/s específicas de cada tratamento, de conformidade coa regulación establecida no Regulamento xeral de protección de datos (Regulamento UE 2016/679 do Parlamento e do Consello) e na Lei orgánica 3/2018, de protección de datos persoais e garantía dos dereitos dixitais. A lexitimación do tratamento baséase no cumprimento dunha obrigación legal e/ou no cumprimento dunha misión realizada en interese público ou no exercicio de poderes públicos conferidos a este responsable, para levar a cabo as súas función de selección e xestión do persoal, e/ou calquera outras inherentes á relación laboral/funcionarial. O prazo de conservación dos datos será o legalmente previsto. Os seus datos persoais unicamente serán obxecto de cesión, no seu caso, previo consentimento ou de acordo co previsto na lexislación antedita. Poderá exercer os seus dereitos de acceso, rectificación, supresión, oposición, limitación do tratamento e portabilidade, así como opoñerse á toma de decisión individuais automatizadas, ante o responsable do tratamento, que é a Deputación Provincial de Ourense, ou ante o seu delegado de Protección de Datos, no correo electrónico dpd@depourense.gal. En todo caso, os interesados poderán formular as reclamacións que consideren oportunas en relación co tratamento dos seus datos persoais ante a Axencia Española de Protección de Datos.

PRESIDENTE DA DEPUTACIÓN PROVINCIAL DE OURENSE

RELATORIO DE MÉRITOS

ANEXO II

APELIDOS E NOME: ___________________________________________________________

DNI/NIE: ________________________ TELÉFONO MÓBIL: ___________________________

Para os efectos do baremo aplicable, acredita os méritos que a seguir se especifican e achega documentación xustificativa deles.

1. Polos servizos prestados na mesma categoría ou análoga categoría profesional:

ANOS	MESES	DÍAS

2. Por cada curso realizado, impartido por administracións públicas, universidades, INEM, formación continua no marco do acordo de formación continua para as administracións públicas ou formación ocupacional, relacionado coas funcións para desenvolver:

DENOMINACIÓN	ORGANISMO EMISOR	ANO	HORAS

______________, ____ de _________________ de 20 ___

ANEXO III

BLOQUE I

Tema 1. O réxime local español: a autonomía local. O municipio: organización fundamental e competencias. A provincia de réxime común no réxime local español. As deputacións provinciais: organización e competencias.

Tema 2. O servizo público local. Os servizos mínimos obrigatorios. Os modos de xestión dos servizos públicos. Xestión directa e indirecta.

Tema 3. Lei 27/2013, do 27 de decembro, de racionalización e sostibilidade da Administración local.

Tema 4. Réxime xurídico das entidades locais. Regulamento de organización, funcionamento e réxime xurídico das entidades locais.

Tema 5. O patrimonio das entidades locais. As propiedades públicas: tipos. O dominio público, concepto, natureza e elementos. Comprobación material do investimento en función do seu importe. Utilización, aproveitamento e alleamento dos bens locais. Réxime das autorizacións e concesións demaniais.

BLOQUE II

Tema 6. Lei 39/2015, do 1 de outubro, do procedemento administrativo común: Os interesados no procedemento e a capacidade de obrar. Identificación e firma dos interesados no procedemento.

Tema 7. Os actos administrativos: Concepto e clases. Requisitos e eficacia. Nulidade e anulabilidade. Fases do procedemento administrativo. Tramitación simplificada do procedemento administrativo. A obriga de resolver. Suspensión do prazo para resolver. Ampliación do prazo para resolver e notificar. A falta de resolución expresa: O réxime do silencio administrativo. Termos e prazos. Execución dos actos e resolucións administrativas. Os recursos administrativos: concepto e clases. Requisitos xerais. Materia recorrible, lexitimación e órgano competente.

Tema 8. O procedemento administrativo electrónico na Lei 39/2015, do 1 de outubro, do procedemento administrativo común das administracións públicas: concepto e especialidades. Emisión de documentos electrónicos pola administración. Validez e eficacia das copias de documentos administrativos electrónicos e en papel. Sede electrónica.

Tema 9. Lei 40/2015, do 1 de outubro, de réxime xurídico do sector publico: disposicións xerais, principios de actuación. Funcionamento electrónico do sector público. dos órganos das Administracións Públicas. Dos convenios. Relacións interadministrativas.

BLOQUE III

Tema 10. Os recursos das facendas locais no marco do Real decreto 2/2004, do 5 de marzo, polo que se aproba o texto refundido da Lei reguladora das facendas locais. Ingresos de dereito privado. Ingresos de dereito público.

Tema 11. O Orzamento xeral das entidades locais: concepto e contido. Especial referencia ás bases do orzamento. A elaboración e aprobación do Orzamento xeral. A prórroga orzamentaria.

Tema 12. A estrutura orzamentaria. Os créditos do Orzamento de gastos: delimitación, situación e niveis de vinculación xurídica. As modificacións de crédito; clases, concepto, financiamento e tramitación.

Tema 13. A execución do Orzamento de gastos e ingresos; as súas fases. Os pagos para xustificar. Os anticipos de caixa fixa. Os gastos de carácter plurianual. A tramitación anticipada de gastos. Os proxectos de gastos. Os gastos con financiamento afectado; especial referencia ás desviacións de financiamento.

Tema 14. A liquidación do Orzamento. Tramitación. Os remanentes de crédito. O resultado orzamentario: concepto, cálculo e axustes.

Tema 15. O remanente de Tesourería: concepto e cálculo. Análise do remanente de Tesourería para gastos con financiamento afectado e do remanente de Tesourería para gastos xerais.

Tema 16. A Conta xeral das entidades locais. Os estados e contas anuais e anexos da entidade local e seus organismos autónomos: contido e xustificación. As contas das sociedades mercantís. Tramitación da Conta xeral. Outra información para subministrarlles ao pleno, aos órganos de xestión e a outras Administracións públicas.

Tema 17. A Lei xeral tributaria: disposicións xerais do ordenamento tributario. Os tributos: disposicións xerais. Os obrigados tributarios. A débeda tributaria.

Tema 18. A xestión tributaria: tributos provinciais, propios e delegados. Competencias da Deputación en materia de xestión tributaria. Delegación e colaboración.

Tema 19. A xestión tributaria: Beneficios fiscais, réxime e compensación. Recargas e xuros de mora. Infraccións e sancións tributarias.

Tema 20. Participación nos tributos do Estado e das Comunidades Autónomas, subvencións e prezos públicos.

BLOQUE IV

Tema 21. Lei 9/2017, do 8 de novembro, de contratos do sector público: Obxecto e ámbito de aplicación. Negocios e contratos excluídos. Tipos contractuais. Elementos estruturais dos contratos.

Tema 22. Lei 9/2017, do 8 de novembro, de contratos do sector público: Partes no contrato: órganos de contratación. Capacidade e solvencia do empresario. Prezo e contía do contrato. Revisión de prezos nos contratos das administracións públicas. Garantías esixibles na contratación do sector público.

Tema 23. A Lei 9/2017, de contratos do sector público: dos contratos das Administracións Públicas. Preparación dos contratos das Administracións Públicas. Adxudicación dos contratos. Dos efectos, cumprimento e extinción dos contratos administrativos. Modificación dos contratos.

Tema 24. A Lei 9/2017, de contratos do sector público: Os distintos tipos de contratos das Administracións Públicas. O contrato de obra. O contrato de concesión de obras.

Tema 25. O contrato de concesión de servizos. O contrato de subministro. O contrato de servizos. Os contratos mixtos.

Tema 26. Lei 9/2007, do 13 de xuño, de subvencións de Galicia: Disposicións comúns ás subvencións públicas. Procedementos de concesión e xestión das subvencións. Do reintegro e control financeiro das subvencións.

Tema 27. Plan estratéxico de subvencións. Especial referencia aos da Deputación Provincial de Ourense.

Tema 28. Estatuto básico do empregado público e a Lei do emprego público de Galicia. Clases de persoal ao servizo das administracións públicas.

Tema 29. A prevención de riscos laborais: réxime xurídico. Política en materia de prevención de riscos laborais para protexer a seguridade e saúde no traballo. Dereitos e obrigas. Servicios de prevención. Delegados de prevención, comités de seguridade e saúde.

Tema 30. A planificación da xestión pública: Natureza e obxectivos. Tipos de plans. O proceso de planificación. A planificación estratéxica e operativa. Programación e xestión de proxectos.

BLOQUE V

Tema 31. Actos xurídicos europeos vinculantes: Regulamento, Directivas e Decisións. Actos xurídicos europeos non vinculantes: Resolucións e ditames.

Tema 32. Procedemento xurídico da Unión Europea e Procedementos de adopción de decisións. As Fontes de Dereito Europeo.

Tema 33. Principio de Subsidiaridade e de Proporcionalidade na Unión Europea.

Tema 34. Procedemento Orzamentario da Unión Europea.

Tema 35. O Sistema Institucional Europeo: evolución, composición e características.

Tema 36. O Consello Europeo: O proceso de institucionalización, organización e funcións.

Tema 37. A Comisión Europea: organización, competencias, poderes e funcionamento.

Tema 38. O Consello: composición, presidencia e funcionamento.

Tema 39. O Comité de representantes permanentes, funcionamento.

Tema 40. O Parlamento europeo: Marco institucional, composición, funcionamento, e poderes.

Tema 41. O sistema xudicial europeo. Tribunal Xeral e Tribunais especializados.

Tema 42. O Tribunal de xustiza: Organización e funcionamento.

Tema 43. O Tribunal de Contas e o investimento na UE.

Tema 44. O Banco central europeo e o sistema europeo de bancos centrais.

Tema 45. Os órganos auxiliares, medios e sé.

Tema 46. Financiación da Unión Europea. Os Fondos Estruturais e de Inversión Europeos Fondos Europeos. Período 2021-2027.

Tema 47. Prioridades da Comisión Europea. Actual Período orzamentario.

Tema 48. Plan de Recuperación Europea para España.

Tema 49. Regulamento (UE) 2021/1060, do 24 de xuño, do Parlamento Europeo e do Consello, relativo ao Fondo Europeo de Desenvolvemento Rexional, ao Fondo Social Europeo Pluus, ao Fondo de Cohesión, ao Fondo de Transición Xutas e ao Fondo Europeo de Marítimo, de Pesca de Acuicultura.

Tema 50. Regulamento (UE) 2021/1058, do Parlamento Europeo e do Consello, do 24 de xuño de 2021, relativo ao Fondo Europeo de Desenvolvemento Rexional e ao Fondo de Cohesión.

Tema 51. Fondo Social Europeo Plus. Regulamento (UE) 2021/1057, do Parlamento Europeo e do Consello, do 24 de xuño de 2021.

Tema 52. INTERREG. Regulamento (UE) 2021/1057, do Parlamento Europeo e do Consello, do 24 de xuño de 2021, sobre disposicións específicas para o obxectivo territorial europeo.

Tema 53. Fondo de Transición Xunta. Regulamento (UE), 2021/1056, do Parlamento Europeo e do Consello, do 24 de xuño de 2021.

Tema 54. Programa FEMPA, Fondo Europeo Marítimo, de Pesca e de Acuicultura.

Tema 55. Fondo Europeo Agrario de Desenvolvemento Rural.

Tema 56. Next Generation Galicia. Estratexia para a Transformación de Galicia.

Tema 57. EISMEA. Axencia Executiva Europea.

Tema 58. Axencias Europeas descentralizadas.

Tema 59. Reparto en España dos Fondos de Cohesión entre as Comunidades Autónomas. Período actual.

Tema 60. Programa ERASMUS+

Tema 61. Programa LIFE

Tema 62. Programa EUROPA DIXITAL

Tema 63. Programa EUROPA CREATIVA

Tema 64. Programa MERCADO ÚNICO

Tema 65. Programa CIDADÁNS, IGUALDADE, DEREITOS E VALORES

Tema 66. Programa HORIZONTE EUROPA

Tema 67. Mecanismo “Conectar Europa”.

Tema 68. Mecanismo de Recuperación, Transformación e Resiliencia. Reparto en España entre comunidades autónomas para a modernización da formación profesional (Compoñente 20)

ANEXO RELATIVO AO RÉXIME DE PROTECCIÓN DOS DATOS PERSOAIS ACHEGADOS COA SOLICITUDE:

1. O tratamento pola Deputación dos datos persoais que achega a persoa solicitante coa súa solicitude baséase no disposto nos apartados c) e e) do artigo 6 do Regulamento UE 2016/679 do Parlamento Europeo e do Consello, do 27 de abril de 2016, relativo á protección das persoas físicas no que respecta ao tratamento dos datos persoais e á libre circulación destes datos, así como no artigo 8.2 da Lei orgánica 3/2018, do 5 de decembro, de protección dos datos persoais e garantía dos dereitos dixitais, ao ser a achega dos datos e informacións esixidas nas presentes bases, necesaria para o cumprimento do disposto na lexislación de emprego no sector público así como para a valoración das solicitudes. En consecuencia, a negativa a facilitar estes datos á Deputación determinará a exclusión da persoa solicitante do procedemento.

2. En cumprimento do establecido no artigo 13 do Regulamento UE 2016/679 do Parlamento Europeo e do Consello, do 27 de abril de 2016, relativo á protección das persoas físicas no que respecta ao tratamento dos datos persoais e á libre circulación destes datos, infórmase ás persoas interesadas do seguinte:

a) A responsable do tratamento dos datos é a Deputación Provincial de Ourense, cuxo representante legal é o seu presidente, Luis Menor Pérez, con domicilio para os efectos de notificacións na rúa do Progreso, núm. 32, 32003 Ourense, teléfono de contacto 988 317 500 e correo electrónico: dpd@depourense.gal

b) O delegado de protección de datos da Deputación de Ourense pode contactarse no enderezo electrónico dpd@depourense.gal, e ante el (ou directamente ante o responsable do tratamento) poderá exercer os seus dereitos de acceso, rectificación, supresión, oposición, limitación do tratamento e portabilidade, así como opoñerse á toma de decisión individuais automatizadas.

c) Os datos subministrados coa solicitude destínanse unicamente a garantir o cumprimento do establecido na lexislación do emprego público do sector público, a comprobar que a persoa solicitante reúne os requisitos establecidos para a súa admisión e á valoración da súa solicitude. Publicaranse na sede electrónica da Deputación as listas provisionais e definitivas de persoas admitidas e excluídas, as actas dos tribunais cualificadores e a resolución de nomeamento. As publicacións referidas manteranse durante o período de tempo estritamente necesario para o fin que se persegue e, como máximo durante un prazo de 5 anos dende a realización da publicación, podendo, a partir dese prazo, ser suprimida a publicación de oficio pola Deputación ou ben por solicitude das persoas interesadas, dirixida ao responsable do tratamento ou ao delegado de Protección da Deputación de Ourense (DPD), na rúa do Progreso, 32, 32003 Ourense ou ben, a través do enderezo electrónico dpd@deporuense.gal

d) A base xurídica do tratamento dos datos achegados coa solicitude é a necesidade de coñecer eses datos para o cumprimento das obrigas legais que impón a lexislación do emprego público á Deputación (artigo 6.1.c) do Regulamento UE 2016/679). No caso dos datos necesarios para acreditar o cumprimento dos requisitos específicos da convocatoria e a valoración de solicitudes, a necesidade de coñecer eses datos é para satisfacer a finalidade de interese público (organización e xestión do emprego público provincial) perseguida coa convocatoria (artigo 6.1.e) do Regulamento UE 2016/679).

e) Os datos subministrados á Deputación de Ourense serán tratados exclusivamente polo persoal autorizado da propia Deputación para a tramitación da solicitude, suxeitos a deber de reserva. Estes datos poderán ser cedidos a terceiras persoas nos seguintes casos:

- Ao resto de persoas solicitantes ou aos seus representantes legais cando así o reclamen para a formulación de reclamacións ou interposición de recursos.

- Aos xulgados e tribunais, para os efectos da resolución dos recursos administrativos e xudiciais que poidan interpoñerse contra os actos e resolucións susceptibles de recurso, así como aos membros dos tribunais cualificadores, Ministerio Fiscal, Valedor do Pobo, Defensor del Pueblo, Tribunal de Contas e Consello de Contas, na medida en que sexa necesario para o exercicio das funcións dos tribunais e das devanditas autoridades públicas.

- Aos deputados provinciais, cando o reclamen, para o exercicio do seu dereito á información.

f) En ningún caso se transferirán os datos persoais a un terceiro país nin a unha organización internacional.

g) Os datos subministrados conservaranse nos arquivos da Deputación de forma indefinida, para os únicos efectos da súa conservación conforme co disposto na lexislación sobre arquivos do sector público e na lexislación sobre patrimonio documental cultural.

h) En todo momento, as persoas interesadas poderán solicitarlle á Presidencia da Deputación o acceso aos seus datos, así como a súa rectificación, de ser o caso. Poderá solicitarse a limitación do tratamento dos ditos datos, referida á súa publicación, unha vez finalizado o procedemento, sempre que conste a firmeza do acto administrativo que lle poña fin e transcorrese o prazo sinalado na letra c) anterior desta base. Poderá formularse, igualmente, a oposición ao tratamento dos datos, motivada pola situación particular da persoa interesada, nos termos previstos no artigo 21 do Regulamento UE 2016/679. Os dereitos sinalados neste apartado poderán exercerse mediante un escrito dirixido á Presidencia da Deputación. De conformidade co disposto no artigo 20.3 do Regulamento UE 2016/679, non será de aplicación o dereito á portabilidade dos datos subministrados á Deputación neste procedemento.

i) En todo caso, a persoa interesada poderá formular as reclamacións que considere oportunas en relación co tratamento dos seus datos persoais ante a Axencia Española de Protección de Datos.

j) En ningún caso se procederá á adopción de decisións automatizadas nin á elaboración de perfís persoais cos datos subministrados, que non serán obxecto de tratamentos diferentes aos expresamente previstos nesta base.

k) Respecto das persoas que participen nas quendas por diversidade funcional, a publicación da súa identidade realizarase mediante o número completo do seu documento nacional de identidade, número de identidade de estranxeiro, pasaporte ou documento equivalente, salvo que previa e expresamente manifeste o seu consentimento á publicación do seu nome completo. Neste último caso, identificarase, ao igual que o resto de aspirantes, mediante a publicación do nome e apelidos engadindo catro cifras numéricas aleatorias do seu documento nacional de identidade, número de identidade de estranxeiro, pasaporte ou documento equivalente.”

Ourense, 23 de xuño de 2026. O presidente.

Asdo.: Luis Menor Pérez.

R. 1.542